Тус хөгжмийг анх 1987 онд тухайн үеийн дуурийн симфони найрал хөгжим, найрал дуучид, чуулгын үндэсний найрал хөгжим, хөдөлмөрийн баатар, ардын жүжигчин, төрийн шагналт, Зууны манлай уртын дууч Н.Норовбанзад тэргүүтэй уран бүтээлчид оролцож, нэрт удирдаач Ж.Чулууны удирдлага дор бичлэгээ хийж байсан түүхтэй. Уг киноны хөгжим, давтамжийг тооцохгүйгээр 90 орчим минут үргэлжилдэг юм. Энэ тухай ардын жүжигчин, төрийн хошой шагналт, хөгжмийн зохиолч Н.Жанцанноров хуучлахдаа “Энэ киноны хөгжмийг хийхэд өмнөх кинонуудаас өөрөөр хийхгүй бол болохгүй байсан. Яагаад гэхээр өмнө нь “Түмний нэг”, “Тунгалаг тамир”, “Өглөө” гэх мэт кино хийсэн байсан. Эдгээрийн хөгжмөөс шал ондоо хийх шаардлагыг “Мандухай сэцэн хатан” кино шаардаж байсан. Үүнийгээ дагаад ямар нэгэн байдлаар монголын хөгжмийн сэтгэлгээнд өөрчлөлт хийх хэрэгтэй байсан. Киноныхаа хөгжийг анх удаа үндэсний найрлыг, симфони найрал хөгжимтэй хамтран хийсэн. Нийт хөгжмийн багт 300 гаруй хүн ажиллаж байсан” хэмээв