Удахгүй албан тушаалаа өгөх гэж буй, АНУ-ын Төрийн нарийн бичгийн даргын орлогч Виктория Нуланд Киевт айлчилж “Манай улсаас Украинд шилжүүлсэн өндөр нарийвчлалтай “GLSDB” пуужингууд аль хэдийнэ замд гарсан” гэж мэдэгдсэн нь олон улсад шуугиан тарьсан билээ. Учир нь GLSDB (Ground Launched Small Diameter Bomb буюу Газраас хөөрдөг нарийн диаметртэй бөмбөг) нь Америкийн “Boeing” болон Шведийн “Saab” компаниудын шинэ зэвсэг гэдгээр онцлог юм. Эдгээр бөмбөг одоогоор АНУ-ын зэвсэглэлд ч ороогүй байгаа билээ. Иймээс л Виктория Нуланд “Би тулааны талбарт Путинд зориулан түүнийг “баярлуулах” гэнэтийн бэлэг үлдээж байна” гэж хэлсэн хэрэг. Тэгвэл өнгөрсөн хоёрдугаар сарын 22-нд Украины арми Херсон муж дахь Подо-Калиновка суурингийн ойролцоох сургалтын талбайд жагсаж, бөөгнөрсөн Оросын цэргүүдэд “HIMARS” пуужин харвах системээр цохилт өгч нэг дор 68 цэрэг амь үрэгдсэн. Энэ явдлаас хоёр хоногийн өмнө Украины Зэвсэгт хүчин Волноваха хотын ойролцоох Трудовское тосгоны дэргэд байдаг Оросын армийн бэлтгэлийн талбайд 200-300 орчим цэрэг хошууч генерал Олег Моисеевийг ирэхийг угтан бэлтгэлийн талбайд жагсаж байхад нь мөн л “HIMARS” пуужин харвах системээр цохилт өгч нэг дор 60 гаран орос цэрэг амь үрэгдсэн юм. Хэд хоногийн өмнө Донецк мужийн Еленовка суурингийн орчим талбайд жагсаж байсан Оросын 155 дугаар тэнгисийн тусгай бригадын цэргүүд цохилтод өртөн, нэг дор 19 нь амь үрэгдэж, даргатайгаа хамт 12 цэрэг шархадсан. Эдгээр нь “HIMARS”-аас хөөргөсөн “GLSDB” буюу Газраас хөөрдөг нарийн диаметртэй, өндөр ончтой задардаг бөмбөгний цохилт юм. Үнэндээ “GLSDB” нь үнэхээр шинэ зэвсэг мөн боловч харин энэ зууны буюу шинэ технологи биш юм. Учир нь “GLSDB” нь одоо хэрэглэж буй онгоцноос салж хол зайд нисэн очиж байгаа онодог “GBU-39” бас “SDB” ч гэдэг өндөр ончтой залуурт бөмбөг болон “M26” гэх хуучин пуужингийн хөдөлгүүрийн нийлбэр юм. Осло хотод 2008 онд бөөнөөр хөнөөх зэвсгийг хориглох НҮБ-ын конвенц батлагдсанаар “кластер” гэх бөөнөөр хөнөөх бөмбөгийг баруун Европын улсууд үе шаттайгаар зэвсэглэлээсээ хасаж, Европын эдгээр улсуудад зөөх хөдөлгүүрүүд нь агуулахад үлдсэн байна. Иймээс Америкийн “Boeing” болон Шведийн “Saab” компаниудын мэргэжилтнүүд одоо хэрэглэж буй зөвхөн нисэх онгоцноос хаядаг “GBU-39” гэх өндөр ончтой бөмбөг, “M26” гэх хуучин пуужингийн хөдөлгүүрийг нийлүүлэн “GLSDB”-ийг бүтээн, үйлдвэрлэж эхэлжээ. Ингэж “GLSDB” нь нисэх онгоц болон нисэх буудал, үүнд үйлчлэх алба хэрэггүй бас үйлдвэрлэхэд нарийн мэргэжлийн хүмүүс, шинэ суурь машин шаардагдахгүй, бусад шинэ зэвсэгтэй адил удаан хугацааны туршилт хэрэггүй хямд, үйлдвэрлэхэд хялбар маш хэрэгцээтэй зэвсэг болж чадсан байна. Иймээс энэхүү шинэ бөмбөг нь HIMARS, эсвэл M270 системээс харвасны дараа байнаасаа эсрэг зүг нисгэсэн ч өөрийн далавчны ачаар 150 км хүртэлх зайд байг маш ончтой устгадаг зэвсэг болж чаджээ. Харин Америкийн “Boeing” болон Шведийн “ Saab” компаниудын мэргэжилтнүүд “GLSDB” бөмбөгийг хос удирдлагатай болгосон учир энэ бөмбөг Оросын радио, электроны эсрэг зэвсгийн нөлөөнд оролгүй байгаа төвөггүй онох чадвартай болсон аж. Энэ нь Украины арми 150 км зайд Оросын цэргийн удирдлагын штаб, зэвсэг, шатахууны агуулах болон ямар ч техник хэрэгслийг устгахаас гадна ямар ч довтолгоог нь няцаах чадвартай болж байна гэсэн үг юм. Өөрөөр хэлбэл, олон сар жилээр байлдаж буй Украины армийн дайчдад “ амарч” хүчээ сэлгэн төвлөрүүлэх боломжийг энэ бөмбөг олгох аж.