Улаанбаатар хотын гудамж, цэцэрлэгүүдийн ногоон байгууламжийн арчилгааны ажлыг сайжруулах, эзэнжүүлэх зорилгоор цэцэрлэгжилтийн хувийн хэвшлийн байгууллагуудад нийтийн эзэмшлийн гудамж, цэцэрлэгийг хариуцуулан өгсөн.

Занабазар, Дилавхутагт Жамьянжав, Бага тойруу, Зайсангийн тойрууд тохижилт, ногоон байгууламжийг хариуцах хувийн хэвшлийн байгууллагуудад Улаанбаатар хотын Захирагчийн ажлын албанаас заавар зөвлөмж өглөө.

Ногоон байгууламжийн норм стандартыг чандлан мөрдөж графикт усалгааг тогтмол хийж, ургахгүй байгаа модыг авч шинэ мод тарьж, явган хүний замын хавтанг суулгахдаа түвшингийн зөрүү үүсгэхгүй байхад анхаарахыг зөвлөв. Ажлын гүйцэтгэлд Улаанбаатар хотын Захирагчийн ажлын алба, хөндлөнгийн төрийн бус байгууллагууд хяналт тавих юм.

Энэ үеэр Улаанбаатар хотын Ерөнхий менежер Б.Бадрал ногоон байгууламжийн хувийн хэвшлийн байгууллагуудад “ Тохижилт, ногоон байгууламж, инженерийн ажлуудыг уялдуулах шаардлагатай. Тохижилт, ногоон байгууламжийн ажлыг хийхдээ стандартыг чанд мөрдөж ажиллах хэрэгтэй”-г онцолсон.

“Асем-11” уулзалтын бэлтгэлийг хангах ажлын хүрээнд Жамьян гүн, Гэндэнгийн гудамжинд хийгдэж буй тохижилтын ажилтай танилцсан.бөгөөд Выставка худалдааны төвийн хажуугаар явган хүний зам тавина. Монголын хүүхдийн ордон, Выставка худалдааны төв гэх мэт тухайн гудамжинд байрлаж буй хувийн хэвшлийн байгууллагуудтай хамтарч орчных нь тохижилтыг хийхээр төлөвлөж байна гэж Улаанбаатар хотын Захирагчийн ажлын албанаас мэдээллээ.