Израилийн армийн бэлтгэл офицер, нэрт зохиолч, нийтлэлч, цэргийн түүхч Григорий Тамарын YouTube дээр тавигдсан “Иранд өгсөн цохилт-том тоглоомын эхлэл” тайлбар болон “Яаралтай мэдээлэл! Өнөөдөр Ираны бүх пуужин, “шахед”-ын үйлдвэр устгагдсан” нэртэй ярилцлагыг нэгтгэн товчилж, орчуулан хүргэж байна.

Гурван долоо хоног хүлээлгэсний эцэст Израиль Иранд хариу цохилт өгөв. Харамсалтай нь энэ цохилтын тухай андуу ташаа мэдээлэл ялангуяа Иран, Оросын талаас хэргээр худал мэдээлэл тарааж, Оросын нэг блогер бүр “Ираны хотын гудамжинд Израилийн нисгэгчдийн шарилыг зөөн авчирч байна” гэж мэдээлэв. Иймээс та бүхэнд энэхүү цохилтын талаар үнэн бодит мэдээлэл өгөхийг хүсч байна.

Юуны өмнө энэ цохилтод Израилийн цэргийн бүх салбар ямар нэг хэмжээгээр оролцсон гэдгийг онцолмоор байна. Энэхүү агаарын цохилтын үр дүнд Сири, Ираны Агаараас хамгаалах хүчнийг газрын хөрстэй тэгшилсэн. Ийм агаарын цохилт дэлхийн дайнаас хойш болж байгаагүй. Үүнийг 10-хан сая хүн амтай, жижигхэн Израиль улс хийж чадлаа. Энэ ажиллагаанд тагнуул, дайрагч, халхавч, тээвэр, агаарт түлш цэнэглэгч зориулалттай нийт 100 гаруй онгоц оролцож зөвхөн Иран төдийгүй Ливан, Сирид цохилт өгсөн. Ливанд өгсөн цохилтоор Хезболлагийн газар дор байгуулсан хот шиг хэмжээ, сүлжээтэй бэхлэлтийг 400 тн тэсрэх бодисоор бүрэн устгаж чадсан бөгөөд энэ тэсрэлтээр 4,5 баллын газар хөдлөлт бүртгэгдсэн. Манай цэргүүд Хезболлагийн зэвсгийн агуулахыг эзэлж авахад тэнд байсан Оросын шинэ зэвсгийн хэмжээ манай ерөнхий сайдыг хүртэл гайхуулсан. Иран Израильд цохилт өгөх үед Иран, Оросын мэдээллийн хэрэгслүүд “Израилийн тэдэн онгоцыг устгаж, ийм тийм хохирол учрууллаа” гэж огт худал мэдээлэл тарааж байсан. Эдгээр улсуудын нийгмийн тогтолцоо, биологи нь бодит үнэнийг бус зөвхөн худал, хуурмагийг тараах зохилдлоготой. Иймээс үүнд гайхаад байх зүйлгүй.

Энэхүү цохилтын үр дүнд бид Сири, Ираны Агаараас хамгаалах хүчнийг бүрэн устгасан гэдэг нь бүх цэргийг нь устгасан гэсэн үг биш, харин эдгээр улсын агаараас хамгаалах хүчний хэрэглэж байсан Оросын бүх С-300, С-400 пуужингуудыг Израилийн нисгэгчид Америкийн бөмбөг, пуужингаар бүрэн устгасан гэсэн үг юм. Орос хэлээр явуулдаг миний нэвтрүүлгийг сонсож буй хоёр хүний нэг нь Оросууд байдаг гэдгийг би мэднэ. Иймээс би тэдэнд та нарын гайхуулаад байдаг агаараас хамгаалах С-300, С-400 пуужингууд бол зүгээр л хог, новш гэдгийг хэлье. Танай пуужингууд манай онгоцнуудыг сөнөөх нь байтугай ганц ч онгоцонд шалбархай учруулж чадаагүй. Энэхүү цохилт хийсэн нисгэгчдийн дунд манай дөрвөн эмэгтэй нисгэгч оролцсон. Энэ бол бидний бахархал. Энэхүү агаарын цохилтоор манай улсад аюул учруулж буй “шахед” дрон, шингэн түлштэй пуужингийн үйлдвэр болон пуужин, дроны бүрэлдэхүүн хэсгийг нийлүүлдэг бүх үйлдвэрүүдийг Израиль устгаж чадсан. Ираны пуужингийн үйлдвэрлэлийн хөгжил хэдэн жилээр буцаж ухарсан. Иймээс энэ бүхэн бол Украинчуудын хувьд яах аргагүй баярлах ёстой үйл явдал мөн.

Тийм ээ, бид энэ удаа Ираны цөмийн болон нефтийн байгууламжид цохилт өгөөгүй. Хэрэв ингэсэн бол дэлхий дээр нефтийн үнэ өсч ХАМАС-ын найз Путин бөөн баяр болох байв. Мөн Ираны иргэд гэрэл цахилгаангүй болох байв. Энэхүү цохилтын зорилго нь Ираны өнөөгийн махчин, фашист удирдлага бодит байдал дээрээ ямар арчаагүй болохыг ард олонд нь нээн харуулах явдал байсан. Бид энэ зорилгоо биелүүлсэн. Энэ цохилт бол байлдааны нэг л шат. Энэ бол зөвхөн эхлэл. Учир нь Иран хариу цохилт өгнө. Тэр цагт Израилийн хариу цохилт Ираны өнөөгийн фашист дэглэмийн бэлгэ тэмдэг болсон улстөрчид болон Ираны хувьсгалыг хамгаалах корпусын удирдлагуудын хувьд тэдний үхэл, дэглэмийнх нь мөхөл байх болно. Харин Ираны арми, ард түмэн бол Тегераны өнөөгийн фашист дэглэмийн бэлгэ тэмдэг биш ээ. Учир нь Израиль Ираны батлан хамгаалах, нийгэм, соёлын бүтээн байгуулалтад тусалдаг байсан тэр сайн цаг эргэж ирээсэй гэж бид хүсдэг. Мөн манай цохилтын дараа бидэнтэй хиллэдэг сунитууд наанаа аргагүйн эрхэнд биднийг муулж байгаа ч цаанаа “Израиль Ираныг байранд нь тавьлаа” гэж бөөн баяр болсон. Үүнд Азербайжан, Йемен, Арабын Нэгдсэн Эмират, Саудын Араб гэх мэт улсууд багтаж байна. Харин Оросуудад хэлэхэд, та нарын магтаад, гайхуулаад байдаг зэвсэг чинь үнэндээ бол гуравдагч зэрэглэлийн улсын зэвсэг. Иймээс та бүхэнд баяр хүргэе! Та нар зөвхөн өөрсдөөсөө муу зэвсэгтэй улсыг л дээрэлхэн довтолж чаддаг. Харин бид та нарын нармайг нэг бус удаа нээж байсан. Энэ удаа бүх зүйл дөнгөж эхэлж байна. Иймээс цаашид юу болохыг харцгаая! Иран төдийгүй зарим улсын том нийслэл бидний өгөх цохилтод чичрэх болно! Ямар ч хоргодох байр та нарыг манай пуужин, бөмбөгнөөс хамгаалж чадахгүй! Эдгээр улсын махчин дэглэм солигдох ёстой! Та бүхэнтэй хамт байсан Григорий Тамар. Баярлалаа. Баяртай.

Үнэхээр ч Израилийн цэргийн түүхчийн энэ тайлбар, мэдэгдлийн дараа Өмнөд Солонгос болон Израилийн цэргийнхэн Украинд очсон гэдэг нь тодорхой болоод байна. Энэ нь Киевийн хувьд маш сайн, харин Москвагийн хувьд хэтэрхий гэмээр муу мэдээ билээ.