–Шинэ он гарангуут машины татвар нэмэгдсэн нь хүмүүсийг нэлээд бухимдуулж байх шиг байна. Нийслэлийн Иргэдийн төлөөлөгчдийн хурлын төлөөлөгчөөр ажиллаж байгаа хүний хувьд та татвар нэмсэн асуудлыг юу гэж харж байна вэ?

-Энэ асуудлыг 2024 оны хоёр, гуравдугаар сард Иргэдийн төлөөлөгчдийн хурлаар оруулаад шийдчихсэн юм шүү дээ. Тэгээд хэрэгжиж эхлэх хугацаа нь 2025 оны нэгдүгээр сарын нэгэн байхгүй юу. Ардчилсан намын хувьд ч тэр, нийслэлийн Ардчилсан намаас сонгогдсон төлөөлөгчийн хувьд ч тэр дуугарч байна. Би 2020-2024 онд нийслэлийн төлөөлөгч байсан. Хуралдаан бүр дээр үүнийг ярьж байлаа. Татварыг огцом нэмэх нь зохимжтой юу, зохимжгүй юу. Зорилго нь юу юм бэ. Иргэдийнхээ орлогыг нэмж чадаагүй байж шууд татвар нэмэх нь зүй зохистой юу гээд тухайн үед нь акц хийж байсан. Харин иргэд, олон нийт анзаараагүй л өнгөрсөн байх. Нийслэлийн захиргааны байрны гадаа үүнтэй холбоотой иргэдтэй уулзалт хийгээд эсэргүүцэж байлаа . Гэвч нэг их анзааралгүй, тэгсхийгээд л өнгөрсөн. Тухайн үеийн хуралдааны протколыг ухаад үзвэл хэн нь дэмжсэн, хэн нь дэмжээгүй вэ гэдэг нь гараад л ирнэ. Одоо бол нэгэнт гарчихсан шийдвэр. Одоо яах юм. Түүнээс хойш зургаан сард нэг сонгууль, арван сард бас нэг сонгууль боллоо. Тийм л байсан юм бол сонголтоо зөв хийхгүй яасан юм. Татвар нэмдэг, асуудлыг хүчээр шийддэг ийм л сонголтыг өөрсдөө хийсэн шүү дээ, ард түмэн. Одоо юунд нь гоншигноод байгаа юм. Ийм шийдвэр гаргасан хүмүүс чинь сонгогдсон болохоос томилогдсон хүмүүс биш. Өөрсдөө очоод л саналаа өгөөд сонгосон. Хотын сонгууль есөн дүүрэг дээр 45 мандаттай. Үүний 40 хүн нь МАН-ын хүмүүс. Одоо юу ярих юм, юу ч ярихгүй шүү дээ. Мөрийн хөтөлбөрийг нь хараад, ажлыг нь хийлгүүл л дээ. Сонголтоо хийхдээ мэдээж сайн хүн, сайн мөрийн хөтөлбөр. Эд нар ажил хийж чадна гэж сонгосон байлгүй дээ. Нэгэнт сонгочихсон учраас одоо 2028 он хүртэл гоншигнох эрх байхгүй.

–Нийслэлийн утаа, түгжрэл гээд асуудлууд нь огт шийдэгдээгүй байхад дахиад татвар нэмэгдчихлээ. Энэ иргэдийн сонголтын л үр дүн гэж үү?

-Хотод тулгамдаж буй хэд хэдэн асууудал байгаа. Ажилгүйдэл, ядуурал, утаа, түгжрэл, эрүүл мэнд гээд. Эдгээрийг цогцоор нь хотын түвшинд шийдчихээр асуудлууд бас байгаа. Тэдгээрийгээ шийдээд явах л хэрэгтэй. Өнөөдрийн байгуулагдсан хотын захиргаа, ИТХ том төсөл хөтөлбөрүүд гээд яриад явж байна. Бидний хувьд одоо цөөнхийн цөөнх болсон. Арайчүү гэж бүлэгтэй л байх шиг байна, таван төлөөлөгчтэй. Эд нарын хийж байгаа ажил дээр нь хяналтаа тавиад явна. Мэдээж утаагүй, түгжрэлгүй болгоно гэвэл дэмжээд л явна. Түгжрэлгүй болгох гэж байна гээд эсэргүүцэж болохгүй биз дээ.

–Сөрөг хүчин гэхээрээ л эсэргүүцнэ гэсэн үг биш л дээ?

-Тийм, бид ч гэсэн үүрэг хүлээгээд сонгогдсон хүмүүс. Иргэд биднийг утаагүй, түгжрэлгүй болгож өгөөч ээ л гэж сонгосон. Тэгэхээр энэ хүслийг нь биелүүлж, сонголтыг нь хүндэтгэх ёстой. Одоо хот дээр том төслүүд танилцуулж байна. Түлшийг багасгана, газ, цахилгаан гээд бусад эх үүсвэрийг ашиглая гээд явж л байна. Ер нь бол нэг л зүйл байгаа юм. Гал түлэхгүй байлгах ганцхан л арга бий. Тэр нь орон сууцжуулах. Тэгэхээр үүн рүүгээ илүү анхаарч явах ёстой.

-Нийслэлд эрх барьж байгаа нөхдүүд утаа, түгжрэлгүй болгохын тулд ямар ажил хийе гэж байна вэ?

-Сая төсөв хэлэлцээд танилцуулсан. Засаг дарга ирэх дөрвөн жилийнхээ үйл ажиллагааны хөтөлбөр, хийх ажлаа албан ёсоор танилцуулсан л даа. Түгжрэлийг бууруулах тал дээр бол тойрог зам, Туулын хурдны зам, трамбай, нийтийн тээвэр гээд ярьж байна. Олон жил ярьж байгаа. Одоо ч ярьж л байна. Гэхдээ хийгээсэй, хэрэгжээсэй гээд л хараад сууж байна.

-Та түрүүн нийслэлийн хэмжээнд хийж болох ажлууд бий гэсэн. Энэ талаараа дэлгэрүүлээч?

-Гэр хорооллоо маш хурдан төлөвлөлт, зохион байгуулалтад оруулах хэрэгтэй. Хүн аятай , тухтай амьдрах орчныг нь бид бүрдүүлэх ёстой шүү дээ. Заавал өндөр, өндөр байх албагүй. Тав, долоон давхраар төлөвлөөд явж болно. Дээрээс нь дэд төвүүдийг хурдан ашиглах хэрэгтэй байна. Сэлбэ төв, станц гээд олон жил ярилаа. Нэг юм барих гэж маш их удах юм. Би 2012-2020 онд Баянзүрх дүүргийн дэд бүтэц хариуцсан орлогчоор ажилласан. Тэр үед Амгалан дулааны станцыг буулгаад шинээр барьсан. Ингэхдээ гурван жилийн дотор л бариад дуусгачихсан. Үүн шиг эх үүсвэрүүдийг олноор нь барих хэрэгтэй. Тэгж байж баригдаж байгаа байшингуудаа дулаанаар хангана.

–Дэд төвүүд яригдаж эхлээд бас л олон жил болчихлоо шүү?

-Дэд төвүүд 2013 оноос хойш явсан. Сэлбэ, Баянхошуу дэд төвийн ард гарах гэж л ийм урт хугацаа зарцуулж байна.

-Энэ удаагийн Нийс лэлд урьд хожид байгаагүй төсөв баталсан гэж байгаа.Танай нам бүлэгтэй ч гэсэн хэт цөөн төлөөлөгчтэй. Тэгэхээр эрх баригчид та хэдийн зөвлөгөө, үгийг хэр авч байна?

-Төлөөлөгч болгон л хуралдаан дээр үгээ хэлэх эрхтэй. Гол нь олонхын саналаар асуудал шийдэгдэнэ. Үүн дээрээ л цөөнх болчихоод байгаа болохоос биш хангалттай л үгээ хэлж байгаа. Нийт 5.8 их наяд төгрөг. Бараг 50 хувь үнэт цаасны хөрөнгө оруулалт, гадны хөрөнгө оруулалт, бонд, зээл гээд явж байгаа. Тэгэхээр энэ их мөнгөөр асуудлуудаа л хурдан шийдэх хэрэгтэй байна. Ялгаагүй л би, миний үр хүүхэд, ах дүүс, найз нөхөд амьдарч байгаа хот. Нэг өдрийн өмнө ч гэсэн хот түгжрэл, утаанаасаа салах ёстой. Үүний төлөө л зорьж байна.

Т.ДАРХАНХӨВСГӨЛ