Хүн бүр сэтгэл санаагаа сэргээж, бие махбодоо тайвшруулах нь эрүүл мэндэд нэн чухал билээ. Өнөөдрийн зорин очсон энэхүү өвөрмөц кафе зөвхөн кофе, цайгаар үйлчлэхээс гадна тав тухтай орчинд өхөөрдөм нохой, мууртай цагийг хөгжилтэй өнгөрөөх боломжтой юм.

Амьтадтай ойр байх нь хүний стрессийг зөвөөр тайлахад тусалдаг аж. Дэлхийн томоохон хотуудад янз бүрийн амьтадтай кафе нээгдэж байгаа бөгөөд гэртээ тэжээвэр амьтан тэжээх боломжгүй, цаг зав бага хүмүүст зориулсан үйлчилгээний соёлыг дэлгэрүүлж буй “Cotton cat cafe”–аас сурвалжиллаа.

---

Тус кафен үүдээр ороход “Дүрмээ уншсан уу?, Гараа заавал угаагаарай” хэмээн зогсох бүсгүйг Бумжаа гэдэг. Тэрбээр кафен үүсгэн байгуулагчдын нэг юм.

Энэхүү кафе 18 үүлдрийн 22 мууртай гэнэ.

Тэрбээр “Cotton cat café”аа 2022 оны арванхоёрдугаар сарын 10-нд амьтныг хайрлах соёлыг Монголд дэлгэрүүлэх зорилгоор анх байгуулсан хэмээсэн юм.

Мөн “Бага хугацаа мэт боловч энэ хүртэл олон зүйл болж өнгөрлөө. Манай кафе 10-аас дээш насны хүүхэд хүлээн авах дүрэмтэй. Гэтэл хүмүүс бага насны хүүхдээ дагуулж ирэх нь элбэг.  Манайх хүүхдийн тоглоомын газар, амьтны хүрээлэн биш. Бага насны хүүхдүүд ихэнх нь учраа мэдэхгүй болохоор мууруудыг ядраах, тоглоом шиг харьцах нь бий. Эцэг эхэд нь шаардлага тавихаар “Мөнгөө төлсөн” гэх шалтгаанаар хүлээж авахгүй байх  хандлага их байдаг. Өмнө нь манайх бялуу зардаг байсан.

Гэтэл хүмүүс дүрэм хэлж, анхааруулсаар байтал бялууны крем бүр хулганы хор хүртэл нууж өгсөн тохиолдол гарсан. Үүнээс болж есөн муур маань хордлогод орж, үхсэн. Энэ дунд миний өөрийн Ами, Хүрэлээ хоёр маань байсан юм. Маш хэцүү байсан болохоор кафегаа хаая гэж бодсон юм.

Тэгээд сар гаруй бодсоны эцэст үргэлжлүүлэхээр шийдсэн. Ингэхдээ гудамжинд байгаа эзэнгүй муурын зулзагыг аврахаар шийдсэн” хэмээн ярилаа.

Энэхүү кафе нэг цагийн 20 мянган төгрөг. Амтат кофе, цай уунгаа муур эрхлүүлж, хамт зургаа даруулж болно. Энд байгаа бүх муур өөрийн гэсэн онцлог нэртэй. Bobby, Roshell,  Наруто, Mosko зэрэг өхөөрдөм муураас гадна сиси нэртэй нохой ч бий. Нохой нь үүдний хэсэгт байх бөгөөд муурууд нь тусдаа хаалгатай өрөөнд байрладаг. Буйдан, телевиз, сандал ширээ гээд тэнд тав тухыг бий болгожээ. 

Зарим муур нь тоглож, зарим нь унтаж байлаа. Тэнд байгаа хүүхдүүд хэвтэж буй муурыг илж, тэвэрч, энхрийлж байсан юм.

Сонирхуулахад “Cotton kitten shelter: Гудамжинд эзэнгүй байгаа 50 зулзага хамтдаа аварцгаая аян”-г эхлүүлжээ. Тус аян эзэнгүй муурын зулзагыг авран вакцин туулгад хамруулаад, насан туршид нь хайрлан амьдрах гэр бүлд албан ёсоор гэрээ хийж үрчлүүлэх зорилготой аж.

-Яагаад 50 гэж?

–Үржлийг нь хаалгаагүй муур нэг жилд 2-3 удаа 4-12 ширхэг зулзага гаргадаг. 1 жил 6 сарын дараа энэ 50 зулзага багаар бодоход 1800 болно. Энэ тоо цаашаа бүр ч өснө. Эхний удаа 50 зулзага гэж байгаа ч цаашдаа аварсаар эмчлээд эдгээгээд үрчлүүлээд явна. Одоогийн байдлаар 57 зулзагыг өөрсдийн нөөц бололцоогоороо аварсан байна. Эдгээрээс 25 зулзага эзэнтэй болсон. Бид зулзагуудаа үрчлэхэд тохиромжтой нас буюу 3 сар хүрэхийг нь л хүлээж байна. Мөн аварсан зулзагуудаа эхний удаа бүтэн шинжилгээ үзлэгт оруулдаг.

Өвчтэй  нэг зулзагад өдрийн 30.000- 100.000 төгрөг зарцуулдаг юм.

Муурын өвчлөл гадуур их бий. Манайд ирж байгаа аврагдсан зулзагуудаас эрүүл зулзага ховор байгаа учир заавал тест тавьж шалгах шаардлагатай болдог. Эмчилгээ авч чадахгүй зулзагуудыг унтуулах шаардлагатай. Унтуулахад мөн 160.000 болон түүнээс дээш зардал гарна.

Манайх зардлаа зөвхөн кафегаар үйлчлүүлж байгаа хүмүүсийн төлбөрөөр нөхөх гэж хичээдэг. Мэдээж энэ нь маш хүндрэлтэй. Тиймээс 2025 төгрөг хандивлах хандивын аянд нэгдээрэй. Энэ хөөрхөн амьтдыг эрүүл саруул, эрх дураараа амьдрахад маш их тус болно хэмээн кафен эзэн ярилаа.

 

 

 

Г.ЦОГЗОЛМАА