Хүүхэд нохойд хазуулж буй бичлэг цахим орчинд нийтлэгдээд байгаа билээ. Нохой хүүхдийг гурван минут орчим зууж, хазсаны дараа паркийн ажилтан барьж салгасан байгаа юм. Энэ үед хүүхдийн хажуугаар насанд хүрсэн 2-3 хүн өнгөрсөн боловч туслаагүй нь камерын бичлэгт хадгалагдаж үлдсэн учраас цахим орчинд иргэд бухимдалтай байгаа билээ.

Бичлэгт гарч буй нохойд хазуулсан хүүхдийн ээж өөрийн цахим хуудастаа “Дөрөвдүгээр сарын 20-ны өдөр паркийн баруун талын хашаанд байх хүүхдийн тоглоомын газарт 10 настай охиныг маань үеэл эгч нартайгаа явж байхад нь хүзүүвчтэй овчарка (бараг өөрөөс нь том) хазаж гэмтээсэн. Тус байгууллагынхан хүүхдийн төлөө үйл ажиллагаа явуулдаг байж гурван минут орчим хүүхдийг нохой хазаж байхад хэн ч ирээгүй. Камер шүүхэд нэг өвгөн ирж нохойг хүзүүвчнээс нь татаад авч байх юм. Паркийн дарга нь хамгаалагч нартаа хүүхдийн ар гэрээс хэрүүл хийж ирээгүй бол нохойг тавиад явуул гэсэн байдаг. Хүүхдээ нохойд хазуулаад хэрүүл хийгээд гүйж байх уу. Зүгээр л аргалах үүрэг хүлээсэн ажилчид…” хэмээн бухимдлаа илэрхийлсэн байсан юм.

Бид иргэдээс “Хэрэв таныг гадуур явж байхад хүүхэд нохой руу дайрвал очиж туслах уу” гэхэд бүгд л “тусална” гэсэн хариултыг хэлж байсан юм.

Иргэн Ш.Өлзийбат: -Очно шүү дээ. Туслалгүй яах вэ. Миний хүүхдээс ялгаа юу байх вэ. Би чинь өөрөө нохойд зуулгаж байсан болохоор сүүлд нь их хэцүү байдаг юм. Одоо хараад байхад гадуур эзэнгүй золбин ноход их харагдах боллоо. Энэ чинь бас л нэг асуудал. Үүнийг цэгцлэх хэрэгтэй байх. Энэ үйл явц бол хүний мөн чанар алдагдсаны нэг жишээ гэж харж байна.

Иргэн Д.Цэрэндэжид: –Би өөрөө бага насны хүүхэдтэй болохоор хүүхдүүдээ ганцааранг нь явуулдаггүй. Цахимаар яваад байсан бичлэг бол нүд халтирам юм билээ. Би нохойноос айдаг ч үнээх ийм зүйл тохиолдвол очно.

Болохгүй бол хүн дуудна. Бичлэг дээр хажуугаар нь өнгөрсөн хүмүүс нохойноос айдаг байж болох ч ядаж очоод, мод чулуу олоод шидсэн бол тэр нохой яваад өгөх байсныг үгүйсгэхгүй. Дээрээс нь нохой тэжээдэг хүмүүс нохойгоо зөв авч явмаар байна. Хүний хүүхдийг гэмтээчихвэл эзэд нь хариуцлага хүлээдэг ч юм уу, бүү мэд.

Иргэн Г.Батдэлгэр: –Эзэнгүй ноход, тэр дундаа хүүхдийн тоглодог нийтийн эзэмшлийн талбайд нохойд хазуулна гэдэг бол үнэхээр аймшигтай.

Тэр бичлэгийг олж үзээгүй ч сонсоход л зүрх шимширч байна. Би лав тийм зүйлтэй таарвал шууд л очно. Хэзээ ч хажуугаар нь зүгээр өнгөрч чадахгүй. Салгах оролдлого хийх л байх.

Иргэн Э.Будханд: –Хэрэв хүүхэд рүү нохой дайрч, урж байгаатай таарвал шууд л очно. Нохойноос айдаг ч зүгээр өнгөрөхгүй гэж бодож байна. Энэ чинь хүн төрөлхтөнд байх ёстой чанар гэж боддог. Хүүхэд өөрөө биеэ хамгаалах чадваргүй болохоор адаглаад тусламж дуудаж өгнө.

Иргэн Ц.Мөнхзул: -Өөрөө хүүхэдтэй болохоор туслахаас өөр сонголт гарахгүй байх. Эмэгтэй хүн чинь ээж болчихоор хүний хүүхдийг ялгалгүй өөрийнхөө хүүхэд шиг боддог, хайрладаг юм билээ. Нохойноос бага зэрэг айдаг ч ямартаа ч очно. Тухайн үед туслаагүй өнгөрсөн хүмүүст ямар бодол төрснийг мэдэхгүй ч сэтгэл гаргаад туслаад өнгөрсөн бол буруудах юм үгүй л байсан болов уу.

 

Г.БАЛГАРМАА