Сэлэнгэ аймгийн нэгдсэн эмнэлгийн 31 эмч ажлаасаа гарах тухай өргөдлөө өгсөн тухай мэдээлэл цахим орчинд нийтлэгдээд буй юм. Үүсээд байгаа асуудлын талаар тус эмнэлгийн эмч нарын төлөөллөөс тодрууллаа.

---

-Цахим орчинд танай эмнэлгийн эмч нар халагдах өргөдлөө өгсөн гэх мэдээлэл гарсан байна. Энэ асуудал юунаас болсон талаар ярихгүй юу?

-Өнгөрсөн сарын 9-нд Сэлэнгэ аймгийн Эрүүл мэндийн газрын дарга Ж.Од тушаал гаргаж, Нэгдсэн эмнэлгийн даргаар Жавхлант сумын ЭМТ-ийн дарга А.Шинэ-Од гэх хүнийг үүрэг гүйцэтгэгчээр томилсон. Аймгийн Засаг дарга байсаар байхад ингэж томилсон. Мөн Сэлэнгэ аймгийн Засаг дарга Н.Лхагвадоржийн томилсон үүрэг гүйцэтгэгчээр ажиллаж байсан Б.Цэрэнтогтох эмчийг ажлаас нь чөлөөлсөн тухай бичиг ирээгүй. Эрүүл мэндийн тухай хуульд аймгийн Засаг дарга томилох ёстой байтал Эрүүл мэндийн газрын дарга томилсон нь хууль бус шийдвэр. Энэ шийдвэрийг хүлээж авахгүй гээд тэр өдөр 168 эмч, ажилчид эсэргүүцсэн албан бичгээ аймгийн Засаг дарга руу, мөн манай аймгаас гарсан УИХ-ын гишүүн Ч.Ундрам, Нийгмийн бодлогын хэлтэс, Эрүүл мэндийн газар луу хүргүүлсэн. Энэ хугацаанд бид ажлаа хэвийн хийгээд явж байсан. Мөн шинээр томилогдсон гээд байгаа эмнэлгийн дарга ямар ч шаардлагагүй хүнийг ажилд авч байна. Жишээ нь, сүрьеэгийн эмчийн орон тоо илүү байхад шинээр хоёр эмч авсан, ерөнхий мэргэжлийн эмч илүү байхад нэмээд хоёр мэргэжлийн эмч авсан, чих хамар хоолойн хоёр эмч байхад дахиад эмч авсан байна. Дээрээс нь ажиллаж байгаа эмч нарыг маш их стресст оруулдаг. Манай энд лайв хийдэг нэг эмэгтэй байдаг юм. Тэр хүнийг манай ажилчдын хурал дээр дуудаж авчраад, мэдээлэл цацаад, баг хамт олныг хагаралдуулдаг. Энэ асуудлаас болоод эмнэлгийн алба хаагч, эмч нартай уулз гэхээр уулзахгүй, зөвхөн сувилагч болон асрагч нартай уулзаад бидний эсрэг үйл ажиллагаа явуулж байгаа. Тийм учраас бид цаашдаа хамтарч ажиллахгүй, энэ хүнийг дэмжихгүй гээд ажлаас халагдах өргөдлөө аймгийн Засаг даргад өгөөд долоо хонож байна. Өргөдөл өгсөн эмч нар ажлаа хэвийн хийж байгаа. Бид долоо хоногийн дотор энэ асуудлыг шийдэж өгөхгүй бол ажлаасаа гарна.

-Өмнө нь ийм асуудал гарч байсан уу?

-Өмнө нь манай байгууллагын дарга нар дотроосоо сонгогдоод явж байсан учраас ийм асуудал үүсч байгаагүй. Энэ асуудлын шалтгаан нь аймгийн Эрүүл мэндийн газрын дарга Ж.Од гэдэг хүн буруу томилгоо хийсэн. Хоёрдугаарт, манай аймгийн Эрүүл мэндийн салбарыг энэ хүн маш их хавчдаг. Манай нэгдсэн эмнэлгийн эмч нар нэг ч удаа мэргэжил дээшлүүлэх сургалтад хамрагдаж, төрийн сангаар сурч байгаагүй. Эмнэлэгт квот байхгүй гэдэг шалтгаанаар ерөөсөө явуулдаггүй. Тэгсэн хэрнээ өөрийнхөө хамаарал бүхий этгээдүүдийг явуулдаг.

-Энэ асуудал гарснаас хойш танай эмнэлгийн үйл ажиллагаа доголдсон уу. Эмнэлгээс үйлчилгээ авч байгаа иргэдэд эргэлзээ үүсэх гэх мэт асуудал гарсан уу?

-Бид тусламж үйлчилгээгээ хэвийн үзүүлээд явж байгаа. Ямар ч эмч, сувилагч ажлаасаа гарсан, ажлаа хаясан зүйл байхгүй. Гэхдээ манай Сэлэнгэ аймаг 120 мянган иргэнтэй. Энэ асуудлаас болоод иргэдийн итгэх итгэл буурч, төөрөгдөл үүссэн гэж бодож байгаа. Өмнө нь манай удирдлагын багууд үйл ажиллагаагаа хэвийн явуулаад болж л байсан. Гэтэл гэнэт гаднаас нэг хүн томилоод оруулаад ирсэн. Тэр хүн нь томилох субьект биш учраас бид ашиг сонирхлын зөрчилтэй гэж үзэж байна.

-Өргөдөл өгсөн эмч нар ямар чиглэлийн эмч нар байгаа вэ?

-31 эмч маань эрчимт эмчилгээ, яаралтай тусламж, эх барих эмэгтэйчүүд, мэс засал, нярай гээд дандаа яаралтай тусламж шаардсан эмч нар байгаа. Бид энэ асуудлаар сарын өмнөөс хууль хяналтын байгууллагад хандсан байсан. Үүнтэй холбоотой эмч нарт маань ажилд орох саналууд ирээд байгаа. Үүнээс болоод эмчээ алдах эрсдэл үүснэ. Өргөдөл өгсөн эмч нарын хувьд 40 хүртэлх насны, мэргэжлээрээ 5-15 жил ажилласан нарийн мэргэжлийн хүмүүс. Өргөдөл өгөөгүй ажилчдын хувьд дундыг харсан байр суурьтай байна. Улс төрийнхөн биднийг оролдоогүй байхад аймгийн Эрүүл мэндийн газрын дарга нь бодлогоо бусниулж, асуудал үүсгэж байгаад эмч нар бид дуу хоолойгоо нэгтгэх хэрэгтэй гэж бодсон.

-Хэрэв та бүхэнд нааштай хариу хэлэхгүй бол ажлаасаа гарах уу. Энэ талаар бодож үзсэн үү?

– Бидний гол шаардлага бол Сэлэнгэ аймгийн эрүүл мэндийн газрын дарга хууль бус томилгоогоо болих хэрэгтэй. Тэмцээд байгаа эмч нар дарга болох гэж байна гэдэг зүйл манай аймгийн зарын сайтуудаар явж байна. Энэ хүмүүст тийм зүйл байхгүй. Бид өмгөөлөгчөөс зөвлөгөө авсан. Сарын өмнөөс өргөдлөө өгөөд, ажлаасаа гарах талаар хөдөлмөрийн тухай хуульд байдаг. Хүсэлтийн хариу өгөхгүй бол бид хуулийн хугацаанд асуудлыг шийдвэрлүүлнэ.

Г.БАЛГАРМА