Монгол Улсын ерөнхий прокурорын газраас мэдээлснээр, Чингэлтэй дүүргийн нутаг дэвсгэрт 2024, 2025 оны эхний таван сарын байдлаар нийт 1274 залилах гэмт хэрэг бүртгэгдсэний зургаан хувь буюу 76 хэрэг нь “Телеграмм” аппликэйшн ашиглан үйлдэгдсэн байна. Эдгээр гэмт хэргийн улмаас 72 иргэн нийт 1.3 тэрбум төгрөгийн хохирол хүлээжээ. Ихэнх тохиолдолд иргэд “Телеграмм” сүлжээнд үл таних этгээдээс богино хугацаанд мөнгөө өсгөх, онлайнаар өндөр цалинтай  ажилд урьж байна   зэрэг мэдээлэлд хууртагдаж, бусдын данс руу мөнгө шилжүүлж, залилуулж байгаа нь тогтоогдсон байна.

Чингэлтэй дүүргийн прокурорын газраас цахим орчинд “түргэн мөнгө олох боломж”,” онлайн өндөр орлоготой ажил” гэх мэт урилгад сэрэмжтэй хандаж, хувь хүний мэдээллээ хамгаалахыг анхаарууллаа.

Улсын хэмжээнд телеграмм ашиглан үйлдэгдсэн залилангийн хохирол 2024 онд 11.9 тэрбум, 2025 оны эхний таван  сарын байдлаар 7.3 тэрбум байна.

Прокурорын байгууллагаас хохирогчдын эрх ашгийг хамгаалахаар 2024 онд 9.9 тэрбум, 2025 оны эхний таван сард 5.7 тэрбум төгрөгийн банкны гүйлгээнд хязгаарлалт тогтоох арга хэмжээ авчээ.