Авто тээврийн хэрэгслийн техникийн байдлын хяналтын улсын үзлэг, шалгалтаар улсын хэмжээнд 865 мянган тээврийн хэрэгсэл бүртгэлтэй байгаад АТҮТ-өөс мэдээлэв.

Энэ нь өнгөрсөн оны мөн үетэй харьцуулахад 2.5 хувиар өсчээ.

Улс хоорондын зорчигч тээвэрлэлтийн үйл ажиллагаанд 13 чиглэлд 22 аж ахуйн нэгжийн 160 тээврийн хэрэгслээр үйлчилж байгаа бөгөөд давхардсан тоогоор 13 мянган тээврийн хэрэгслээр 27 мянга гаруй зорчигч тээвэрлэснийг статистик мэдээнд дурджээ. Тэгвэл хот хооронд 55 аж ахуйн нэгж 63 чиглэлд 793 тээврийн хэрэгслээр үйлчилж байгааг албаныхан онцоллоо.

Авто тээврийн үндэсний төвөөс энэ жил 1.6 сая зорчигч тээвэрлэх төлөвлөгөө гаргаснаас биелэлт 84 хувьтай байгаа аж. Өөрөөр хэлбэл, өнөөдрийн байдлаар 1.35 сая зорчигч тээвэрлэсэн гэсэн үг.

Тэгвэл улс хоорондын байнгын ачаа тээвэрлэлтэд 10 чиглэлд 639 аж ахуйн нэгжийн 17855 хүнд даацын тээврийн хэрэгслээр үйл ажиллагаа явуулж байна.