УИХ саяхан даргаа “нүүрсний хулгайч” гээд авч хаячихаад байгаа. Яг жинхэнэдээ Бага хурлаар “дур мэдэн намын дарга болсон” гэж уурлаад ингэж огцруулсан юм.Саяын хэд хоногт МАН юу болоод өнгөрснийг бүгд л харцгаасан. Ерөнхий сайдаа огцруулах гэсэн биш УИХ-ын даргагүй, намын бүлгэгүй, хуулийн сайдгүй,бензингүй ер нь бараг УИХ-гүй болохоо алдсан. Тэгээд нэг юм Цэцтэй хамсаж байж Ерөнхий сайдаа торгоож аваад хэсэг зуур санаа нь амарсан. УИХ даргагүй байгааг бараг мартчихсан байв. Энэ хэд хоногт хэн ч Их хурал даргагүй байна гэж үгүйлсэнгүй. Байсан байгаагүй нь мэдэгддэггүй, албан тушаал биш л баймаарсан, уул нь. Үндэсний аюулгүй байдлын гурван гишүүний нэг биш бил үү. Бас УИХ бол Монгол төрийн эрх барих дээд байгууллага гэж Үндсэн хуульд заасан байдаг даа. Гэнэт энэ бүхнийг санасан ч юм уу, МАН одоо намын Их хурал хүртэл жаахан тайвширсан ч юм уу УИХ-ын даргад өрсөлдөх өрсөлдөөн өчигдрөөс ширүүсч эхэллээ. Уг нь Ардчилсан намыг даргад өрсөлдөөсөй гэж хүмүүс хүсч байсан ч УИХ -ын даргад өрсөлдөхөөр амбицлаж байгаа энэ намын гишүүд гэж юм дуулдахгүй байна. Цагаа тулахаар МАН намын хоёр бүлэг нэгдчихнэ гэж айсан уу, эхнээс нь аль нэг МАН-ын бүлгийг сайн тойглож өөрийн болгох тохироог хийж чадаагүй юм уу. Ямар ч байсан АН-аас УИХ-ын даргад нэр дэвших гэж зүтгэсэн гишүүний нэр одоохондоо алга. Харин УИХ дахь МАН-ын бүлгээс хэд хэдэн гишүүн өрсөлдөж байгаа бөгөөд эхэндээ гурван гишүүн байсан ч одоо Ж.Энхбаяр, С.Баямбацогт нар хүчтэй яригдаж байна. Уг нь Л.Энх-Амгалан гишүүн бас өрсөлдөж байгаа гэцгээж байсан юм. Сүүлдээ нэр нь их бүдэг дуулдаад эхэлсэн байна. Дээрх хоёр гишүүн бусад гишүүн рүү ээлж дараагүй залгаж өөрийгөө УИХ-ын даргад өрсөлдүүлж буйгаа хэлж байгаа юм байна. Энэ хоёр хоёулаа УИХ дахь МАН-ын шинэ бүлгийн гишүүд юм. МАН-ын хуучин бүлгээс одоохондоо УИХ-ын даргад өрсөлдөх хүн дуулдахгүй байна. Ямар ч байсан энэ нам хоёр бүлгээ хуралдуулж хэн олон санал авсан нь УИХ-ын дарга болохоор чуулганд орох байх. Хуучин бүлгийн гишүүд хүний цөөнөөр ялагдаж бүлгүүдээсээ гарч ирэхгүй гэж айгаад дэвшихгүй байх шиг байна гэж улс төр судлаачид таамаглаж байна.

Ө.Тулга