Хууль зүйн сайд Б.Энхбаяр сэтгүүлчид дүрс эвлүүлэн улстөрчдийн нэр төрд халдав гэсэн мэдээлэл хийсэн. Мөн тэрээр “сэтгүүлчид нүүрсний машинтай” гэж зарлаж байсан удаатай. Бодвол авлигаар машины зөвшөөрөл авсан гэсэн утгаар л ингэж хэлсэн байх.Тэрнээс сэтгүүлчид тийм ажил хийж болно болохгүй гэсэн ямар ч хуулийн заалт байхгүй. Хууль зөрчөөгүй л бол сэтгүүлч хүн хүссэн ажлаа хийж болно. Энэнд хачирхаад байх зүйлгүй. Өчигдөр буюу 2025 оны арваннэгдүгээр сарын 12-нд Хууль зүйн сайд Б.Энхбаяр мэдээлэл хийсэн. Энэ нь сэтгүүл зүйд “нөгөө нэр төр гутаасан сэтгүүлчийг зарлах нь” гэж ойлгогдов. Өмнө нь сайд “даваад би зарлана” гэж хэлсэн нь үүнд нөлөөлөв. Гэвч УИХ-ын гишүүн Д.Амарбаясгалангийн хамааралтай гэх “Админерал” компаны талаар ярьсаар байгаад мэдээллээ дуусгасан. Хамааралтай эсэх, хулгай хийсэн эсэхийг шүүх шийдэх байлгүй. Тэрнээс сайд биш. Ер нь энэ бүхнийг сонсож байхад хоорондоо бичилцсэн мессэж зэргээс харахад МАН Монголын баялгийг өөрсдийн юм шиг асгаж цутган, ховдоглон идэж ууж байгаа юм байна л гэж ойлгогдоод байгаа. Одоо ч энэ нам эрх барьж байгаа, эрх мэдлийн төлөө нэр нүүргүй тэмцэлдэж байгаа билээ. Ингэж байгаа нам төрд байх эрх байгаа юм уу. Э.Бат-Үүлийн хэлээд байгаа “МАН-ыг татан буулгая” гэдэг зөв юм биш үү гэж бүх ард түмэнд бууж байгаа биз ээ. Мэдээллийн дараа сэтгүүлчид түүнээс “Нөгөө сэтгүүлч чинь хэн юм бэ, та хэлсэнгүй” гэж асуугаад ч хариулт авч чадсангүй. Сайдыг мэдээлэл хийсний дараахан Цагдаагийн Ерөнхий газраас мэдээлэл хийлээ. Тэд хэлэхдээ Хууль зүйн сайд Б.Энхбаярын түрүү долоо хоногт хэлээд байсан “Э,Г хоёр зураг дүрс эвлүүлэн улстөрчийн нэр төрд халдсан” гэдгийг давтан хэлээд буулаа. Цагдаа “тэд сэтгүүлч юм уу” гэсэн асуултад мөн хариулт хэлсэнгүй. Ингээд сайд, цагдаа хоёул “сэтгүүлч зураг дүрс эвлүүлэн улстөрчийн нэр төрд халдсан” гэсэн мэдээллээ баталж, нотолж чадсангүй. Хууль зүйн сайдын хэлсэн үг худал байх ёсгүй. Хэрэв Хууль зүйн сайд нь ингэж хөөсөрсөн үнэн ч юм шиг, худал ч юм шиг зүйлээр, тэр дундаа нийгмийн чухал салбар болох сэтгүүл зүйн талаар ингэж яриад байвал хэн энэ салбарт итгэх билээ. Иймд сайд болон цагдаагийн газар сэтгүүл зүйгээс уучлалт гуйвал зохилтой.

Ө.Тулга