Politico-гийн энэ сарын 10-нд гаргасан тусгай подкастын ярилцлагад АНУ-ын ерөнхийлөгч Дональд Трамп “Европ бол муудаж доройтсон орнуудын бүлэг. Тэд сул удирдагчтай. Европын төр, засгийн тэргүүнүүд одоо яахаа мэдэхгүй байна” гэж хэлсэн билээ. Мөн АНУ-ын Үндэсний аюулгүй байдлын шинэ стратегид “Европын улсуудын баруун жигүүрийн намуудын нөлөөг хязгаарлах оролдлого бол улс төрийн цензур юм.

Европын Холбооны орнуудад эрх баригчид нь үг хэлэх эрх чөлөө, улс төрийн сөрөг хүчнийг дарамталж байгаа “ноцтой асуудал” бий. Европын албан тушаалтнууд Украин дахь дайны төгсгөлд “бодит бус хүлээлт” үүсгэж байна. Европын ихэнх иргэн энх тайван хүсч байгаа боловч засгийн газрууд ардчиллын үйл явцыг өөрсдөө гажуудуулж байна. Европ 20 жилийн дотор иргэншлийн сүйрэлд хүрч болзошгүй” гэж бичсэн юм. Тэгвэл энэ бүхэнд Еврокомиссын дарга Урсула фон дер Ляйен өнгөрсөн баасан гарагт Брюссельд болсон “Улс төр- 28” арга хэмжээн дээр албан ёсоор хариу мэдэгдэл хийв.

Урсула фон дер Ляйен АНУ-ын ерөнхийлөгч Дональд Трампын “Европ доройтож, сул удирдагчтай болсон” гэсэн мэдэгдлийн хариуд “Европын сонгуульд гадны ямар нэгэн оролцоо байж болохгүй. Улсынхаа удирдагчдыг зөвхөн тэр улсын ард түмэн шийднэ.

Тухайн улсыг хэн удирдахыг бид бус, харин тэр улсын ард түмэн сонгуулиар шийднэ… Энэ бол сонгогчдын бүрэн эрх, үүнийг бид хамгаалах ёстой. Би трансатлантик хамтын ажиллагааны чин үнэнч дэмжигч. Гэхдээ хамгийн чухал нь бид Европын Холбоо гэдгээрээ бахархдаг, өөрийн давуу талыг харж, байгаа сорилтуудаа давж гарч чаддаг. Иймээс Трамп Европын ардчилалд хутгалдах ёсгүй. АНУ-ын ерөнхийлөгч нартай бид үргэлж “маш сайн ажил хэрэгч харилцаатай” байсан, одоо ч тийм хэвээр байгаа.

Гэхдээ Европ өөртөө төвлөрч, бусадтай өөрийгөө харьцуулахын оронд өөрийн хүчтэй тал, сорилтуудад анхаарах ёстой” гэж мэдэгдэв. Тэрээр АНУ-ын шинэ Үндэсний аюулгүй байдлын стратегид “Европ 20 жилийн дотор иргэншлийн сүйрэлд хүрч болзошгүй” гэж бичсэнийг үл зөвшөөрч, Европ сонгуулийн аюулгүй байдлаа гадаад нөлөөллөөс хамгаалж байдаг. Энэ асуудалд гадны хэн нэгэн хутгалдах ёсгүй” гэж онцлог тэмдэглээд АНУ-д хандан “Нэгдсэн Европыг хамгаалах талд зогс” гэж уриалжээ.

 

Г.АМАРСАНАА