Монголын өдөр тутмын сонин “Өдрийн сонин” улиран одож буй 2025 онд улс төр, нийгмийн салбарт өрнөсөн үйл явдлуудаар үнэн бодит мэдээ мэдээлэл, уншууртай ярилцлагууд бэлтгэсэн сэтгүүлчдээ “Оны шилдэг бичлэгийн эзэд”-ээр шалгаруулав. Мөн эрхэлж буй ажилдаа чин сэтгэлээ зориулан, амжилт гаргасан ажилчныхаа хичээл зүтгэлийг үнэлж, оны шилдгээр өргөмжиллөө.

“Өдрийн сонин”-ы Улс төр, эдийн засаг, гадаад мэдээллийн албаны сэтгүүлч М.Мөнхцэцэг: Тэргүүн их хамба лам Д.Жавзандорж “Аз жаргалыг оюун санааны сэтгэлийн мухраасаа бий болгохын төлөө хичээцгээе”, Голдманы шагналт Л.Батмөнх “Байгаль орчныхоо төлөөх өнөөдрийн бидний үйлсэд үр хойч минь талархана”, “Хөдөлмөрийнхөө үр шимийг хүртэж яваа нийслэлийн тэргүүний өрх А.Ганболдынх” зэрэг нийтлэл, ярилцлагууд туурвисан тул “Өдрийн сонин”-ы 2025 оны “Шилдэг бичлэгийн эзэн”-ээр тодорлоо.

Мөн Улс төр, эдийн засаг, гадаад мэдээллийн албаны сэтгүүлч Т.Дарханхөвсгөл: “Авлигад идэгдсэн эрх баригч намын бүлэглэлүүд эвсэнэ гэдэг том аюулын дохио”, “Хөр цасны хайруу, хүйтэн өвөл хүүхдээр морь унуулна гэж саналтгүй шүү, уяачид аа”, Д.Пүрэвдаваа “Татвар нэмэхгүй гэж санал авчихаад нэмнэ гэдэг Эрүүгийн хуулиар бол хууран мэхлэх, залилах гэмт хэрэг” зэрэг нийтлэл, ярилцлагууд туурвисан тул “Өдрийн сонин”-ы 2025 оны “Шилдэг бичлэгийн эзэн”-ээр шалгарлаа.

Түүнчлэн “Өдрийн сонин”-ы редактор Ш.Дэлгэрмааг хамт олноо манлайлан үр бүтээлтэй ажилласан тул “Өдрийн сонин”-ы 2025 оны “Шилдэг ажилтан”-аар тодрууллаа.

“Өдрийн сонин”-ны 2025 оны шилдгүүддээ аз жаргал, ажлын өндөр амжилт хүсэн ерөөе.

 

Г.БАЛГАР