Багш нарын гүйцэтгэлийн үнэлгээний урамшууллыг өгөхгүй байгаа асуудлаар багш Э.Эрдэнэчимэгээс тодрууллаа.

---

-Ирэх жилээс багш нарын цалинг тодорхой хэмжээнд нэмэгдүүлнэ гэсэн боловч та бүхний гүйцэтгэлийн үнэлгээний урамшууллыг өгөөгүй байгаа гэсэн. Энэ талаар байр сууриа илэрхийлнэ үү?

-Миний хувьд бага ангийн багшаар ажиллаад 15 жил болж байна. Мэргэжилдээ дуртай, хүүхдүүдтэй ажиллах сонирхолтой тулдаа л мэргэжлээрээ ажиллаж байна. Өнгөрсөн намар багш нар ажил хаялт зарлаж, цалин хөлс нэмэгдүүлнэ гэсэн хэлэлцээр хийсэн санагдаж байна. Гэтэл одоо бидний гүйцэтгэлийн үнэлгээний мөнгийг одоо болтол өгөөгүй байна. Үүнийг юу гэж ойлгох вэ. Бид ажил хийсэн хөдөлмөрийнхөө хөлсийг л нэхээд байгаа шүү дээ. Түүнээс хүнээс мөнгө зээлэх гээд гуйгаагүй гэдгийг надаар хэлүүлэлтгүй бүгд мэдэж байгаа. Багш нарын дуу хоолой болж байна гээд байсан МҮЭ нь яасан бэ. Энэ талаар багш нартаа тайлбарлаад мэдээлэл өгөхгүй юм уу. Багш нар ажил хаяад, жагсаал хийж байхад гарч ирээд, уулзаад байсан сайд маань яасан бэ. Үнэхээр өгч чадахгүй байсан юм бол яах гэж сүр дуулиантай шалгалт шүүлэг гэж авдаг юм бэ. Хүүхэд хуурч байгаа юм шиг л шийдвэр гаргадгаа хэзээ болих вэ. Арванхоёрдугаар сар бол баярын уур амьсгалтай байдаг, хүн бүрийн дуртай сар. Тэгэхэд ингэж биднийг бухимдуулдаг нь ямар учиртай юм бэ.

-Танай сургуулийн багш, ажилчид ямар байр суурьтай байна вэ?

-Төрийн сан нь гүйлгээгээ хаах гээд байна гээд сургуулийн нягтлан үгээ хэлж байна лээ. Сүүлдээ бид төрд итгэх итгэл байхгүй боллоо. Хамгийн гол нь бид зүгээр суугаад мөнгө нэхээгүй. Гүйцэтгэлийн үнэлгээний мөнгийг авах гэж эрүүл мэнд, цаг заваараа, сэтгэл зүйгээрээ ч хохирсон. Бид маш их ажилласан. Яагаад хөдөлмөрийн минь үнэлэмж, мөнгийг өгөхгүй байгаа юм бэ. Бас хөдөө орон нутагт тогтвор суурьшилтай ажиллаж байгаа багш, ажилтнуудад олгодог тэтгэмжийг олгохгүй гэсэн мэдээлэл байна. Гаргасан шийдвэртээ тууштай биш, дандаа холбирч байдаг эрх мэдэлтнүүдийн чадваргүйг харуулж байна. Ийм төр удаан тогтнохгүй шүү. Ингэж хүн хуурдаг, ёс зүйгүй төртэй болсондоо харамсаж байна. Алсын зорилго нь тодорхойгүй, зөвхөн өнөө маргаашаа л боддог. Ийм байж эх орны хөгжил яриад ч хэрэггүй болжээ. Ийм байдал удаан үргэлжилбэл багшлах хүн ч олдохгүй байх.

Г.БАЛГАРМАА