Монгол Улсын хаан, VIII Богд Жавзандамба хутагтын мэндэлсний 150 жилийн ойг орон даяар тэмдэглэх тухай Монгол Улсын Ерөнхийлөгч Халтмаагийн Баттулга энэ оны нэгдүгээр сард зарлиг гаргасан. Ерөнхийлөгчийн зарлигийг хэрэгжүүлэх зорилгоор Монгол Улсын Ерөнхий сайдын захирамжаар ой тэмдэглэх ажлын хэсгийг БСШУС-ын сайдаар ахлуулан байгуулж, Богд хааны түүх, намтар, улс төр, шашны үйл ажиллагааг судлах, сурталчлах ажлуудыг зохион байгуулж байна.

1911 оны Үндэсний хувьсгалын удирдагч, Монгол Улсын хаан VIII Богд Жавзандамба хутагт Агваанлувсанчойжиняма (1862-1924)-гийн Түмэн өлзий гийсний 150 жилийн ойд зориулсан “Богд хаан 150: ном бүтээлийн өв” сэдэвт үзэсгэлэн Богд Хааны Ордон Музейн үзэсгэлэнгийн танхимд маргааш нээлтээ хийж, энэ сарын 25-ныг хүртэл дэлгэгдэнэ.

Монгол Улсын Ерөнхийлөгч Халтмаагийн Баттулгын ивээл дор зохиогдох “БОГД ХААН 150:НОМ БҮТЭЭЛИЙН ӨВ” Олон улсын эрдэм шинжилгээний хурал аравдугаар сарын 11-12-ны өдрүүдэд зохион байгуулагдах юм.