“Өдрийн сонин”-ы Ерөнхий эрхлэгчийн тушаалаар “Өдрийн сонин”-ы шуурхай мэдээллийн www.admin.dnn.mn сайтын орлогч захирлаар Д.Гансаруулыг томиллоо. Д.Гансаруул МУБИС-ийг Утга зохиолын ажилтан-Сэтгүүлч мэргэжлээр дүүргэсэн бөгөөд 2009 оноос өнөөдрийг хүртэл “Өдрийн сонин”-д тасралтгүй ажиллаж байгаа манай туршлагатай сэтгүүлчдийн нэг. Тэрээр “Өдрийн сонин”-ы 2011 оны Шилдэг бичлэгийн тусгай шагнал, 2019 оны Шилдэг бичлэгийн шагнал, Нийслэлийн сэтгүүлчдийн нэгдсэн холбооны 2019 оны “Шилдэг сэтгүүлч”-ээр тус тус шалгарсан. Мөн Монголын Сэтгүүлчдийн нэгдсэн эвлэлийн “Ган үзэг” шагнал, Хэвлэл мэдээллийн тэргүүний ажилтан тэмдгээр шагнагдсан.

Сэтгүүлч Д.Гансаруул Монголын Зохиолчдын эвлэлийн гишүүн бөгөөд Г.Сэр-Одын шагналт яруу найрагч билээ. МЗЭ-ийн Төв аймаг дахь “Шувуун саарал” утга зохиолын нэгдлийн Удирдах зөвлөлийн гишүүн, нарийн бичгийн даргын сонгуульт ажилтай. “ЗНЭУЧ” туурвилзүйн ном, “Саранд гандсан хөшиг”, “Сарны тосгон”, “Цоохор майлзын түүх” зэрэг яруу найргийн түүврээ уншигчдын гарт хүргээд байгаа юм. Монголын Урлагийн зөвлөлийн 2020-2021 оны “Онцлох уран бүтээлч”-ээр шалгарсан яруу найрагч, зохиолч. Одоогоор Жавзандамба хутагт төвд Буддын гүн ухаан, төвөд хэлний орчуулагчаар суралцаж байна.

“ӨДРИЙН СОНИН”-Ы ЗӨВЛӨЛ