Тайландын шүүх өнгөрсөн гуравдугаар сард болсон газар хөдлөлтийн үеэр нурсан барилгын чанартай холбогдуулан 17 хүнийг баривчлах захирамж гаргажээ. Хөрш Мьянмар улсад болсон газар хөдлөлтийн чичиргээ Бангкок хотод мэдрэгдэх үеэр төрийн байгууллагын зориулалтаар баригдаж байсан 30 давхар цамхаг нурсан юм. Цамхагийн нурангиас 89 хүний ​​цогцсыг гаргасан бол долоон хүн ор сураггүй хэвээр байна.

Баривчлагдсан хүмүүсийн дунд Тайландын барилгын томоохон компаниудын нэг болох “Italian-Thai Development PLC”-ийн Ерөнхийлөгч асан Премчай Карнасутаас эхлээд  уг цамхагийн зураг төслийг боловсруулагчид болон зөвшөөрөл олгодог эрх бүхий албан тушаалтнууд байгаа аж.

Тайландын хэвлэл мэдээллийн хэрэгслээр пүрэв гарагт мөрдөн байцаагчид барилгын тулгуур баганын бүтцээс согог илрүүлсэн гэж мэдээлжээ. Гэхдээ Тайландын эрх баригчид нуралтын шалтгааныг тодруулсан дүгнэлтээ хараахан танилцуулаагүй байна.

Тайландын нийслэлд жуулчдын сонирхлыг татдаг газар болох Чатучак захын эсрэг талд гурван жилийн турш баригдаж байсан уг барилгад Төрийн аудитын газар орохоор төлөвлөж байсан юм. Барилга нурах үед дотор нь 400 гаруй ажилчин байжээ.

Гуравдугаар сарын 28-нд Мьянмарт болсон газар хөдлөлтийн улмаас 3000 гаруй хүн амиа алдаж, 4500 гаруй хүн бэртэж гэмтсэн бөгөөд газар хөдлөлт Тайланд болон баруун өмнөд Хятад зэрэг бусад газарт мэдрэгдсэн байна.