Боловсролын үнэлгээний төвийн хэлтсийн дарга С.Гэндэнжамцтай элсэлтийн шалгалтын талаар ярилцлаа.

---

-Энэ жилийн элсэлтийн шалгалтад ямар хичээлүүд хамгийн их болон бага шалгуулагчтай байна вэ?

-Элсэлтийн шалгалтыг энэ сарын 18-нд эхлүүлэх бүх бэлтгэл ажил бүрэн хангагдаад явж байна. Энэ жил улсын хэмжээнд 50 шалгалтын төв дээр 43300 орчим хүүхэд шалгалт өгөхөөр бүртгүүлсэн. Нийт 10 хичээлээс математикийн хичээлээр 32 мянган шалгуулагч бүртгүүлсэн байгаа. Үүний араас англи хэл, нийгэм судлалын хичээлээр 30 орчим мянган шалгуулагч бүртгүүлсэн. Элсэлтийн шалгалт өгөхөөр бүртгүүлсэн хүүхдүүдийн 80 орчим хувь нь англи хэл, нийгэм судал, математикийн хичээлээр шалгалт өгч байна. Хамгийн бага хүүхэд шалгалт өгч байгаа хичээл гэвэл түүх, орос хэл, газарзүй гэсэн судлагдахуунууд юм. Энэ хичээлүүдээр шалгалт өгч байгаа хүүхдүүдийн тоо 1000 орчим бий. Энэ сарын 18-ны өдрийн өглөө 10:00 цагаас түүхийн хичээлээр элсэлтийн шалгалт эхэлнэ. Харин энэ сарын 21-ий өдөр монгол хэлний хичээлээр дуусна. Шалгуулагч нар өдөрт хоёроос гурван шалгалт өгөхөөр хуваариуд тавигдсан байгаа.

-Элсэлтийн шалгалт өгөх гэж байгаа хүүхдүүд юун дээр илүү анхаарах хэрэгтэй вэ?

-Нэгдүгээрт, шалгалтад ирж байгаа хүүхдүүд шаардлагатай гэсэн бичиг баримтуудыг бэлтгэх хэрэгтэй. Гол нь өөрийгөө нотлох баримт бичиг болон бусад хувийн бэлтгэлээ маш сайн хангаж ирэх ёстой. Суудлын хувиараа хэвлээд, иргэний үнэмлэхтэйгээ шалгалт өгөх өдрөө шалгалтын төв дээрээ нэг цагийн өмнө очсон байх ёстой. Мөн биеийн болон сэтгэл зүйн бэлэн байдлаа маш сайн хангах хэрэгтэй. Харин шалгалтын цагаа шууд тулгаж очих, яарч тэвдэх, сандрах, хоцрох, үүнээсээ болж шалгалтдаа амжилтгүй оролцлох асуудлууд гардаг. Тиймээс замын түгжрэл, бороо, цахилгаан гээд байгалийн бусад хүчин зүйлсийг ч нарийн тооцоолох хэрэгтэй. Хамгийн гол нь шалгалт дөхсөн энэ үед хэт өндөр ачаалал авах хэрэггүй.

Хүүхдүүд цаг нь тулаад ирэхээр өөр дээрээ хэт их ачаалал авах гээд байдаг. Өдөржин, шөнөжин цагийн менежментгүй сууснаасаа болж ядаргаанд орох тохиолдлууд байдаг. Түүнээсээ болоод шалгалтдаа амжилт үзүүлэх магадлал нь буурах тал бий. Тэгэхээр одоо үлдсэн хугацаандаа өдөрт хэдэн цаг хэрхэн шалгалтдаа бэлдэхээ нарийн төлөвлөх хэрэгтэй. Хамгийн гол нь сайн унтаж амарч, шөнийн нойроо хангалттай авах нь чухал.

-Харин эцэг эхчүүдийн хувьд юун дээр илүү анхаарах хэрэгтэй вэ?

-Эцэг эхчүүд, асран хамгаалагчид маань хүүхдэдээ хэт өндөр шаардлага тавихгүй байх хэрэгтэй. Чи заавал шалгалтаа сайн өгч өндөр оноо авах ёстой гэж хүүхдээ шахаж болохгүй. Энэхүү шахаж, шаардсан байдал нь хүүхдийн сэтгэл зүйлд дарамт, айдас бий болгодог. Энэ айдас, түгшүүрээс болж тухайн хүүхэд чаддаг зүйлээ чадахгүй болох сөрөг үр дагавар гардаг учраас үүн дээр анхаарах хэрэгтэй. Харин ч хүүхдэдээ илүү урмын үг хэлж дэмжих хэрэгтэй. Аль болох хүүхдээ тайван байлгаж, зөвлөн туслах замаар харилцан ажиллах хэрэгтэй.

А.Дулам