Баярын амралтын өдрүүдэд онцгой байдлын байгууллага өндөржүүлсэн бэлэн байдалд шилжиж, 21 аймаг, есөн дүүргийн хэмжээнд 513 орчим албан хаагч ажилласан байна.

Энэ өдрүүдэд эрэн хайх аврах ажиллагааны 21, объектын гал түймрийн 45, ой, хээрийн гал түймрийн 11, усны ослын 16, голд болон шаварт суусан ес, цаг агаарын гаралтай аюулт үзэгдлийн гурав, мал амьтны гоц халдварт өвчний нэг, нийт 106 удаагийн дуудлагаар төв, орон нутгийн онцгой байдлын байгууллагын алба хаагчид үүрэг гүйцэтгэн, иргэдийн аюулгүй байдлыг хангаж, тусламж, үйлчилгээ үзүүлжээ.

Энэ хугацаанд усны ослоор 17, объектын гал түймэрт нэг, үерт хоёр нийт 20 хүн амь насаа алдсанаас зургаа нь хүүхэд байна. Тухайлбал, нийслэлийн нэг дүүрэг, найман аймгийн 10 суманд усны ослын 16 тохиолдлоор 13 том хүн, дөрвөн хүүхэд амиа алдсан байна. Усны ослоос урьдчилан сэргийлэх ажлын хүрээнд иргэд ихээр амарч зугаалдаг 19 аймгийн 24 гол, долоон нууранд давхардсан тоогоор онцгой байдлын байгууллагын 1720 алба хаагч, цагдаагийн байгууллагын 664 алба хаагч, Хүүхэд, гэр бүл хөгжил хамгааллын ерөнхий газрын 160 ажилтан, сайн дурын бүлгийн 368 хүн нийт 2912 хүн, 656 техниктэйгээр хөдөлгөөнт эргүүлийн арга хэмжээг зохион байгуулжээ.

Өнгөрсөн 2024 онд улсын хэмжээнд 102 хүн гол, усанд живж амь насаа алдсанаас 17 нь насанд хүрээгүй хүүхэд байсан байна.

Гол, усны осол нь иргэдийн анхаарал, болгоомжгүй үйлдэл болоод бага насны хүүхдийг хараа, хяналтгүй орхисон зэрэг нийтлэг шалтгаанаас үүдэж байгаа тул иргэд та бүхэн сонор, сэрэмжээ дээшлүүлэн, бага насны хүүхдийг хараа хяналтгүй голын эрэг дагуу тоглуулахгүй, зориулалтын бус хийлдэг завь ашиглахгүй байж, мэргэжлийн байгууллагаас өгч байгаа заавар, зөвлөмжийг дагаж мөрдөхийг сэрэмжлүүлж байна.

 

Б.СОЛОНГО