Туркийн Станбул хотноо Украин ба Оросын төлөөлөгчдийн хооронд дайн зогсоох асуудлаар гурав дахь шатны хэлэлцээ болж өндөрлөв.

Улстөрчид болон судлаачид өмнөх уулзалтуудын адил энэ удаагийн хэлэлцээнээс тодорхой ахиц гарахгүй гэж байсан нь ёсоор болж, уулзалт богино хугацаанд болж өндөрлөсөн байна.Цаг хүрэхгүй үргэлжилсэн хэлэлцээний дараа Украины төлөөлөгчдийн тэргүүн Рустем Умеров сэтгүүлчдэд “Киев Украинд гал зогсоох бодитой, яаралтай арга хэмжээг авахыг эрмэлзэж байгаа ба үүнд бэлэн гэдгээ илэрхийлсэн.

Иймээс манай төлөөлөгчид Москваг наймдугаар сарын сүүлчээр ерөнхийлөгч Зеленский болон Путин нарын уулзалтыг зохион байгуулахыг санал болгосон” гэж мэдэгдэв. Харин Орос улс ийм уулзалтыг зөвшөөрөхгүй байгаа билээ. Түүнчлэн, Оросын удирдагч Владимир Путин тодорхой хууль зүйн үндэслэлгүйгээр Зеленскийг хууль ёсны ерөнхийлөгч гэж үзэхгүй гэж мэдэгдсэн юм. Оросын талын төлөөлөгч Владимир Мединский хэлэлцээний дараа сэтгүүлчдэд “Талууд 1200-гаас доошгүй тооны олзлогдогсдыг харилцан солилцох тохиролцоонд хүрсэн. Оросын тал Украинд 3000 украин цэргийн цогцсыг шилжүүлэх санал тавьсан. Мөн Оросын төлөөлөгчид Украины талд фронтын шугам дагуу 24-48 цагийн богино хугацааны түр эвлэрэл зарлах асуудлыг хэлэлцэхийг санал болгосон Энэ нь эмнэлгийн ангиуд шархадсан хүмүүсийг аврах, командлагчид өөрсдийн дайчдын цогцсыг татан авах боломжийг бүрдүүлэх зорилготой юм” гэж мэдэгджээ.

Орос Украины хэлэлцээний эхний шат Станбул хотод тавдугаар сарын дунд үеэр, хоёр дахь нь зургаадугаар сарын эхээр болсон. Эхний уулзалтаар талууд “1000:1000 олзлогдогч” солилцохоор тохиролцсон бол хоёр дахь уулзалтаар дайныг зогсоох нөхцлийн тухай санамж бичгийг солилцож, амь үрэгдэгсдийн цогцсыг харилцан шилжүүлэх шийдвэр гаргаж байв. Энэ удаагийн гурав дахь уулзалтаар уг санамж бичгүүдийн агуулгыг хэлэлцэхээр төлөвлөсөн бөгөөд талууд “Хоёр талын баримт бичиг агуулгын хувьд хэт эсрэг, тэсрэг заалттай байгаа учир аль ч тал нь хүлээн зөвшөөрөх боломжгүй байна” гэж мэдэгдэв.

Энэхүү хэлэлцээ өндөрлөсний дараа хоёр талаас өвчтэй, хүнд шархадсан 1000 гаруй цэрэг эх орондоо буцаж ирсэн байна.

Г.АМАРСАНАА