Жилийн дөрвөн улирал нэг дор хослон оршдог Монголын дээвэр хэмээн нэрлэгддэг Алтай Таван Богд үнэхээр сүрдэм байлаа. Энэ зуны амралтаараа зорьж очсон гайхалтай үлгэрийн мэт газар байсан юм.

Улаанбаатараас аяллаа эхлүүлж, эхний өдрөө Элсэн тасархай үзэн тэр хавьд майхнаа босгон хоноглолоо. Энэ бол жил бүр зорин очих жуулчдын тоо нэмэгддэг ховор тогтоцтой газар. Тэнгэрийн хаяа ягаарч, элсэн манхан, ногоон тал уулсын үзэсгэлэнд баясч хээрийн хоол, цай идэж уух ямар амттай гэж санана.

Зорин очих газар маань хол, үзэх газар ч их тул өглөө эртлэн босож цайгаа уугаад л аян замдаа гарна. Замдаа “Гурван Сэнхэрийн агуй”-г очиж сонирхон зургаа татуулав. Агуйг дотор талаас гадагш харвал ульж буй чонын дүрстэй аж. Бид цааш явж Хар ус нуурын захад очиход цахлайнууд бүчин ирсэн юм. Тэдэнд хоол өгдөг болохоор хүнд бүр дасал болчихжээ. Жаахан талх бариад гараа өргөхөд шүүрч аваад л явчихна. Ингээд цааш явсаар Ховдын “Буянт гол”, “Толбо нуур” гээд хэдэн хэдэн газар үзэж, замдаа хоноглон байгалийн сайхныг биширсээр Баян-Өлгий аймгийн төвд ирлээ. Эндээс фургон олж, хоол идэж аваад л зорьсон газрын зүг хөдөллөө.

Баян-Өлгий аймгийн байгалийн гайхалтай тогтоц бүхий Сүүн гол, Потанины мөсөн гол, мөнх цаст ноён оргилууд, Хурган, Хотон, Номин нуур, Их бага Түргэний хүрхрээ гээд аяллын турш үзэх, бишрэх зүйл зөндөө. Машинтай наанаас нь өгсөж байхад дуу алдам үзэсгэлэнтэй байгаль тослоо. Уулын цаст орой дүнхийх “Алтай таван богд”- ын наана очиход тэврээд авч буй мэт сэтгэл тайвшрах шиг л болсон.

Хараад бишрэм энэ сайхан газрууд сэтгэлд тодоор үлдэх нэг дурсамж байлаа.