Допингийн эсрэг үндэсний төвийнхөнтэй холбоотой янз бүрийн мэдээлэл дуулддаг. Тэр бөхийн цаана тэр тэр байгаа, Хууль зүйн сайдаасаа аваад төрийн өндөр албатай нөхдүүд нутгийнхаа бөхийн асуудлыг дарсан гээд цуурдаг. Нэг хэсэг 13 бөхийн нэр яригдаж наадамд түрүүлж үзүүрлэсэн бүгд допингтой юм шиг дуулддаг байсан. Өмнөх дарга нарынх нь албан өрөөнд АТГ шалгалт явуулж, даргыг нь чөлөөлж ч байсан.

Үнэхээр өндөр албан тушаалтан нөлөөлдөг, хөшигний цаана булхай луйвар болдог нь үнэн юм бол өнөө жил Ерөнхийлөгчийн нутгийн бөхөөс допинг илэрдэг нь ямар учиртай юм бэ. Н.Өсөхбаяр гэж залууг бөхийн хүрээнд ингэж ярьж байна. “Өсөхбаяр бол Ерөнхийлөгчийн аавын нутаг Сүхбаатар аймгийн бөх. Наадмын орой Ерөнхийлөгчийн төрсөн дүү УИХ-ын гишүүн У.Отгонбаяр дагуулж явж баярыг нь тэмдэглэж байсан. Тэгэхээр “Ерөнхийлөгчийн бөх” гэхэд буруудахгүй” гээд ярьж байна.

Тэгтэл “Ерөнхийлөгчийн” хэмээн олон түмэн хэлээд байгаа бөх нь допинг хэрэглэсэн болж таарлаа. Допингийн хариу иртэл ард түмэн “ Батмагнай , Өсөхбаяр хоёроос битгий тэр муухай юм нь илрээсэй” хэмээн залбирч байсан. Өсөхбаяраас илэрлээ гээд шуугихад итгээгүй. Одоо бол итгэж эхэлж байна. Их спортын тайлбарлагч Шижирээ “Өсөхбаяраас бүх цаг үед хориглосон допинг илэрсэн” болохыг нийгэмд хүргэсэн. Энэ бүхний эцэст нэг л зүйлийг бодоход хүргэлээ. Допингийн төвийнхөн аль нутгийн, ямар ар талтай байх нь хамаагүй, гагцхүү шинжилгээний хариуг л үнэн зөв хүргэдэг юм биш үү. Хэрвээ ар сайтай хүн аргалдаг бол Еөкийн дүүгийн дагуулж гангараад байсан бөх хамгийн түрүүнд аргалуулчихмаар юм.

Д.Батболд