Сэлэнгэ аймгийн Баруунбүрэн суманд баавгай айлын мал руу дайрсан тухай мэдээлж байна. Энэ талаар Засаг дарга Б.Отгонбаасангаас тодруулахд “Манай сумын хэд хэдэн уулын амаар хавраас хойш баавгай орж ирээд үхэр барьж идсэн хэрэг удаа дараа гарсан юм. Малдаа явж байгаа хүнийг хөөх үзэгдлүүд ч гарч байсан удаатай. Харин одоо манай сумын “Бумбат”, “Жаргалантын эх” гэдэг газруудад бамбарууштай баавгай айлуудтай маш ойр орж ирээд үхэр тугалыг нь барьж идсэн хэрэг гарлаа. Уржигдрын байдлаар айлын хүүхдийг баавгай хөөсөн гэх яг баттай биш мэдээлэл ирсэн. Тиймээс яаралтайгаар сумын онцгой комисс хэргийн газар дээр очиж хуралдаад бүх айлуудыг нүүлгэх арга хэмжээ авч, зааварчилгаа өгсөн хэдий ч малчид маань нүүхгүй байх асуудал гарч байгаа. Мөн уул руу самар, жимсэнд явсан хүмүүсийг буулгаж ирэх ажлыг өдөр бүр хийж байна. Ер нь манай нутгаар энэ он болон өнгөрсөн онд ч баавгай их үзэгддэг байсан” гэв.

Сэлэнгэ аймгийн Баруунбүрэн сумын байгаль хамгаалагч Д.Цэвэлмаа “Одоогоор баавгай хүн барьж идсэн тохиолдол гараагүй байна. Мөн малчид бэртэж гэмтээгүй гэдгийг ч мэдэгдье. Бидний хувьд малчдын амь нас эрсдэхээс урьдчилан сэргийлэх зорилгоор баавгай үргээлэг болон айлуудыг нүүлгэн шилжүүлэх гээд анхан шатны арга хэмжээнүүдийг авч байна. Баавгай айлын мал руу дайрах болсон шалтгааны хувьд олон таамаг бий. Жишээ нь, сүүлийн үед ой хээрийн түймэр ихээр гарч байгаа. Уур амьсгалын өөрчлөлт, самар, жимс бага ургасантай холбоотой ч байж болно. Мөн баавгайн тоо толгой сүүлийн жилүүдэд эрс өссөнтэй холбогдуулаад баавгай бууж ирсэн гэх таамаглалууд бий. Одоогоор яг ийм шалтгааны улмаас баавгай айлын мал руу дайрсан гэх дүгнэлт гараагүй байна” гэв.

А.Даваадулам