Ижий аавыгаа сэтгэлдээ хадгалан хайрладаггүй, ач буяныг нь санадаггүй хүн гэж орчлонд хаа билээ. Аавын ачлал, ээжийн энэрэл хайрын тухай дуу, шүлэг хүмүүний сэтгэлд нэгийг бодогдуулдаг. Ямар нэгэн дурсамж дурдатгал, дүр зургийг ургуулж ирэх нь бий.

Яруу найргийн хэд хэдэн ном гаргасан хэрнээ би гэдэг хүн аавынхаа тухай ганц дууны шүлэг бичиж чадаагүй өдий хүрчээ. Харин энэ намрын өдрүүдэд Хөшөөтийн голд суугаа аавыгаа санаад ийм нэг шүлэг бичлээ.

“Улаан хадны энгэрт нь

Утаа нь суунагласан гэр минь

Унаган хүлгээ үүрсэхээр

Хүүгээ санасан аав минь

Хөшөөтийн голыг уруудаад

Хөтөлгөө морьтон ергүүлнэ ээ

Хүүгээ санасан сэтгэлдээ

Дуугаа аялсан аав минь…хэмээн эхний хоёр бадгийг бичээд араас нь дахилт хэлбэрээр “Дэндүү ихээр санасан

Дэмий ч гэнэхэн сэтгэл минь

Дэлхийн олон дундаас

Наддаа ганцхан аав минь” хэмээх дөрвөн мөрийг оруулав. Ингээд төгсгөлд нь

“Адуутай нутгаа санахаар л

Айраг нь амтагдаад байх юм аа

Амьдралын өгсүүр таарахаар л

Аав минь бодогдоод ирэх юм аа” хэмээн шигтгэлээ.

“Хурд” хамтлагийн “Аавдаа би хайртай” дууны эзэн Төрийн соёрхолт Х.Чилаажав найрагч шүлгийн минь ая данг анзаарч, УГЗ хөгжмийн зохиолч Т.Сэр-Од аялгуу хийснээр “Наддаа ганцхан аав минь” дуу төрчихлөө. Нас жар хол гарсан ч морио унаад хэдэн адууныхаа араас бөг бөг шогшуулж яваа аавдаа ийм нэг бүтээл хийснээ дуулгамаар санагдаад үүнийг тэрлэлээ.