Монголд олон янзын бизнес хөгжиж, үйл ажиллагаа явуулж байна. Тэр олон бизнесээс ажлын байрын түрээсийн бизнес бараг хамгийн их эрэлттэй гэхэд болох байх. Ямар нэгэн үйл ажиллагаа эрхлэхэд мэдээж хамгийн түрүүнд байр шиг хэрэгтэй юм байхгүй. Тийм болохоор энэ төрлийн бизнес үнэхээр эрэлттэй.

Байрлалаас, зай талбайнаасаа шалтгаалаад түмэн янзын үнэтэй нь мэдээж. Дийлэнх түрээслэгчид аль болох тогтвортой олон жилийн гэрээтэй байхыг хүсдэг. Гэрээ сэлтээ байгуулаад гэрээний дагуу сайхан хамтраад ажиллаж байгаа хамтрагчид маш олон. Харин сайны хажуугаар гэгчээр бас нэг өөдгүй хуншгүй түрээслүүлэгчид олон байх юм аа. Наян юм болж овоо гайгүй хэдэн хүн татаад ирэхээр гэрээгээ шууд зөрчөөд үнэ мөнгөө нугалчихдаг. Эсвэл ерөөсөө л шуудхан “Чи одоо манайхаас зайл аа. Бид өөр хүнд илүү мөнгөөр түрээслэхээр болсон. Тэд хоногийн дотор байраа сулла” гэж хөөдөг. За тэгээд нүүж амжихгүй бол дотоод тохижилтыг нь эвдэж нураахаас эхлээд жинхэнэ өөдгүй зан гаргаж эхэлдэг.

Олон биш ч иймэрхүү түрээслүүлэгч байдгийг харж, сонсож явсан. Түрээслэгч тал яг ийм нөхцөлд ёстой яг яах билээ гэсэн цохилтод шууд ордог. Байсан хэдэн төгрөгөө бараа таваар татах, дотоод гадаад тохижилт гэх мэт зүйлсдээ гаргачихсан байдаг. Ашигтай ажиллагаандаа хүрэх болоогүй байдаг. Ганц шийдэл нь шүүх дээр очдог ч урт сунжирсан юм болсны эцэст цөөн хэдэн төгрөг авсан нэртэй салдаг үзэгдэл түгээмэл. Ийм хүндрэлтэй асуудал ойр тойны олон хүнд тохиолдсоон. Ажлын байр түрээслүүлэгч эзэд өмчөө хэдээр түрээслэх нь өөрсдийнх нь асуудал. Хэд ч байж болно. Гэлээ гээд замын дундаас ингэж заваан аргаар бусдыг хохироогоод байх нь зүйд нийцэхгүй байх. Уг нь тэр жил ажлын байрны түрээсийн тухай ч бил үү дээ нэг хууль УИХ-аар ороод батлагдаагүй. Иргэдэд хэрэгтэй л хууль байсан санагддаг.

Ер нь бол бараа бүтээгдэхүүний үнийн хэт өндөр байдал ажилчдын цалингаас гадна түрээсийн үнэтэй шууд холбоотой л доо. Аль аль талууд гэрээнд заасан хүлээх үүргээ л сайн биелүүлдэг болчихвол ч…