НҮБ-ын Хүний эрхийн зөвлөлийн шийдвэрээр 2022 оны гуравдугаар сард байгуулагдсан Украинд гарсан зөрчлийг мөрдөн шалгах бие даасан олон улсын комиссын тайланд “ОХУ-ын цэргийнхний энгийн иргэдийн эсрэг хийсэн, хийж буй харгис үйлдлүүд нь хүн төрөлхтний эсрэг гэмт хэрэгтэй дүйцэж байна” гэж дурджээ. Тайланд “Оросын цохилтууд нь украинчуудыг гэр оронгүй болгох зорилготой байсан. Орос цэргийн удирддаг дронууд украины иргэдийг олон удаа онилж, тэдний амь насыг хохироож, бэртээж гэмтээж, өргөн хэмжээний эвдрэл сүйрэлд хүргэсэн тухай дурдаад “Оросын цэргийн үйлдлүүд нь хүн төрөлхтний эсрэг хоёр төрлийн гэмт хэрэгт дүйцэж байна. Эдгээр нь “Бусад улсын хүн амыг зорилготойгоор алан хядсан /геноцид/ болон эзлэгдсэн нутаг дэвсгэрүүдээс иргэдийг албадан нүүлгэн шилжүүлсэн” явдал юм. Мөн зарим иргэд Оросын тамлалтад өртсөн байна. Оросын дроноор хийсэн дайралтууд Днепр мөрний баруун эргийн дагуух 300 гаруй км газар нутгийг хамарч, Днепропетровск, Херсон, Николаевын бүс нутгуудад олон тооны иргэний объектуудыг сүйтгэсэн байна. Комисс эдгээрийг Украины оршин суугчдыг гэр орноос нь системтэй, зохион байгуулалттайгаар шахан гаргах ажиллагаа гэж үзэж байгаа бөгөөд энэ нь хүн төрөлхтний эсрэг гэмт хэрэг болох албадан нүүлгэн шилжүүлэлт юм. Оросын цэргийн довтолгооны бай нь иргэдийн орон сууцууд, эмнэлгийн байгууллагууд, бусад иргэний дэд бүтэц, мөн эмнэлгийн яаралтай тусламжийн албаны машин, гал сөнөөгчид зэрэг олон улсын хүмүүнлэгийн хуулиар онцгой хамгаалалттай объектууд байсан байна. Мөн эзлэгдсэн нутаг дэвсгэрүүдээс иргэдийг нүүлгэн шилжүүлэх ажиллагааг оросын эрх баригчид зохион байгуулан удирдаж байсан” гэдгийг онцлон дурджээ. Тайланд баривчилгаа, тамласан байцаалт, иргэдийн хувийн баримт бичиг болон эд зүйлсийг булаан авах зэрэг тохиолдлуудыг ч тэмдэглэсэн бөгөөд эдгээр нь “сэтгэцийн гүн хохирол учруулж, өвдөлт шаналал төрүүлсэн, хүний эрхийг зөрчсөн хүмүүнлэг бус харьцаа юм” гэж үзжээ. НҮБ-ын энэхүү тайланг олон нийтэд нээлттэй 500 видео бичлэг, үүнээс 247-гийн байршил, цаг хугацааг нь шалган тогтоож, Оросын халдлагад өртсөн 226 украин иргэнтэй хийсэн ярилцлагад үндэслэн гаргасан юм байна.