“Bloomberg” агентлаг баттай эх сурвалжаас эш татан, энэ сарын 3-нд “Их Британийн эрх баригчид саяхан ОХУ-ын нутаг дэвсгэрт цохилт өгөхөд зориулагдсан алсын тусгалтай “Storm Shadow” загварын шинэ далавчит пуужингуудаа Украинд нийлүүлсэн байна. Лондон өвлийн улирал эхлэхээс өмнө Кремль Украины энгийн иргэд рүү чиглэсэн довтолгоогоо нэмэгдүүлэх эрсдэлтэй гэж үзэж буй тул эдгээр пуужингуудыг яаравчлан шилжүүлсэн юм байна. Үүнээс гадна Их Британи болон барууны орнууд тэдний Украиныг дэмжиж буй зэвсгийн тусламж нь Оросын эсрэг эдийн засгийн хориг арга хэмжээнээс ч илүү үр дүнтэй байна гэдгийг ОХУ-ын ерөнхийлөгч Владимир Путинд харуулахыг зорьж байгаа юм байна.

Украины Зэвсэгт хүчин “Storm Shadow” пуужингаар анх 2024 оны арваннэгдүгээр сард Орос руу цохилт өгсөн. Энэ нь тухайн үеийн АНУ-ын ерөнхийлөгч Жо Байден Украинд анх удаа АНУ-ын ATACMS пуужингаар Оросын нутаг руу цохилт өгөхийг зөвшөөрсний маргааш болсон үйл явдал байв. Мөн 2025 оны аравдугаар сард Украины тал “Storm Shadow” зэрэг пуужин оролцуулсан “олон төрөл хосолсон пуужингийн агаарын цохилт”-ыг Оросын Брянскийн химийн үйлдвэрт өгсөн. Украины тал уг үйлдвэрийг дарь, тэсрэх бодис, пуужингийн түлшний бүрэлдэхүүн үйлдвэрлэдэг гэж мэдээлсэн. Харин Брянскийн орон нутгийн эрх баригчид энэхүү довтолгооны талаар албан ёсоор мэдээлээгүй юм.

Лондон 2024 оны арваннэгдүгээр сарын эхээр Их Британийн засгийн газар Украинд хэдэн арван Storm Shadow пуужин нууцаар шилжүүлсэн бөгөөд тэр үед нийлүүлэлтийн тухай олон нийтэд мэдээлээгүй. Үүнийг ажиллагааны аюулгүй байдлын үүднээс пуужингийн тоог хэлэх боломжгүй гэж тайлбарлаж байв. Энэ удаа ч манай эх сурвалжууд уг шалтгаанаар бодит тоо хэлэхээс татгалзав. Гэсэн ч энэ онд Оросын цэргийн объектууд болон нефть боловсруулах үйлдвэрүүд рүү хийсэн цохилтуудын дийлэнхийг дроноор гүйцэтгэж байсан Украины агаарын хүчин одоо Оросуудад “олон төрөл хосолсон пуужингийн агаарын цохилт” өгөх боломжтой болов” гэж мэдээлжээ.

 

Г.АМАРСАНАА