Засаг төрөөс гарах мөнгө огт гарахаа болиод удаж байгаа. Засаг мөнгө үгүй болсон, цалин, тэтгэврээ л дөнгөж тавина, бусдыг нь чадахгүй гээд мөнгө нэхсэн болгоны амыг тагладаг. Тэгээд мөнгө цуглуулж байгаа нь энэ хэмээн өглөө ороогүй татвар нэхэж өгч чадаагүй нэгнийх нь дансыг хаачхаад даапаалан инээж суугаа. Ингээд хаячихлаар өгөхгүй хаачдаг юм гэж байгаа юм болов уу даа. Данс хаалттай, мөнгөн гүйлгээ хийгдэхгүй болчихоор ямар юмаараа татвараа төлөх билээ. Мөн хотын гудамжаар машинтай явахын эцэсгүй юм болж байна. “Торгочих юмсаан” гэсэн өлөн нүдтэй тээврийн цагдаа тас ширтээд тэр. Тэгээд бараг л бүхээгтэй чанга инээлээ гээд торгож байгаа. Харин бензинээс болоод хөл хоригдож дээ, тэгээгүй бол “хуугаараа” торгуулж балрах байв. Засгаас авах бүх л гэрээ хэлэлцээний мөнгө хоригдоод удлаа. Төрийн сан хаачихсан, мөнгө байхгүй л гэцгээсэн хүмүүс төрийн контор саваар дүүрсэн.Тэгтэл саяхан 12 дугаар сарын 24-нд төрийн сан хаана гэж байх юм. Нээлттэй л байсан юм биш үү. За энэ ч яах вэ дүүрч. Үүнээс илүү ноцтой юм болж байна. Засгийн газар 16 дэд сайд томилох юм болоод явчихав. Мөнгө үгүй засаг ингэх үү. Ингэхгүй, засагт мөнгө байна. Аль эсвэл ард түмэнд болохоор мөнгө байхгүй болдог, албан тушаалд болохоор мөнгө байгаа юм уу. Тэгэхлээр засгаас гарах мөнгийг хэн харамлаад байна вэ. Сангийн яам, сангийн сайд зөвшөөрөхгүй байна л гэцгээх аж. Энэ үнэн үү Сангийн сайд аа. Таныг нөгөө ард түмний дундах үлгэрт гардаг шиг хүндэрсэн хорголоо хүртэл тоолж өнөөдөр нэг илүү гарчихлаа, их идсэнээс тэр гэж голоо гонсойтол харамсаж суудаг, эргэн тойрны бүх хүнээс юм харамлаж байдаг өвгөн шиг болчихоод байгаа гэдэгт итгэхгүй байна. Он дуустал засагт үйлчилгээ үзүүлсэн аж ахуйн нэгж, засгаас авлагатай иргэд үйлчилгээний хөлсөө, өр зээлээ авмаар байна. Та нэг “гар тэнийгээч”.

Ө.Тулга