Манай охин гурав, дөрөвхөн настай байсан үе юм. Шинэ жил болж байлаа. Гацуурыг нь засаад мялаачихсан. Хүний, өөрийн “бацаан”-уудын бэлгийг тараагаад өгчихсөн. Оройдоо ширээгээ тойрч суугаад буузаа жигнээд, тортоо зүсээд, оргилуун дарсаа буудуулаад бүх зүйл ОК.

Гэтэл гэнэт байдал бишидсэн юмдаг. Яасан бэ гэвэл охин маань 31-ний өдөр гарч ороод л байх юм. Битгий байн байн хаалга онголзуулаад бай гэхээр “За” л гэж байна. Харуй бүрий болохын үед бүр хямарч байна, өнөөх чинь. “Яагаад ирсэнгүй вэ”, “Ийм ойрхон байж…”, “Замдаа хэдхэн айлаар ороод манайд л ирэх ёстой доо” гээд үглэж байна шүү. Сүүлдээ бүр уйлах нь ээ. Гайхаад асуутал “Санта Клаус ийм ойрхон байж манайд яагаад ирэхгүй байгаа юм бэ” гээд “Sky resort” цанын бааз руу хуруугаараа зааж байна. Өвлийн өвгөн ирнэ гэж хүлээгээд л өдөржингөө орж гараад байж. Яагаад ингэж бодсоныг асуутал “өвөл, зунгүй цастай байдаг, дандаа салют буудуулж баяр тэмдэглэдэг. Бас ой модтой. Ой мод байгаа юм чинь янз бүрийн амьтад бий. Өвлийн өвгөн ерөөсөө л тэнд амьдарч байгаа. Голын мөсөн дээгүүр чаргаараа гулгаад л ирэх ёстой. Машины гацалдалт (түгжрэл) огт хамаагүй дээ, уг нь” гээд л бат итгэлтэй ярьж байна аа.

Охин маань өвөл, зунгүй л газар мундсан юм шиг мансардны цонхон дээр сууж тоглох дуртай байдгийн учиг тайлагдав. Ингээд томчуудын “шуурхай”-гаар нэгэн мэргэн шийдвэр гаргаж, нүдийг нь хариулж байгаад гацууран доор нь нууцаар бэлэг орхив. Оройхон тийшээ нөгөө бэлгээ гэнэт олж үзээд бөөн баяр. “Ээж ээ, аав аа! Манайд Санта Клаус орж ирээд, яараад явчихсан байна. Биднийг эмээгийнд байхад орж ирсэн байна шүү дээ. Үүнийг хар даа” гээд л бэлгээ үзүүлж байна. Манай гэр бүлийнхэн мөнөөх Санта Клаусын бэлгийг дөрөвдүгээр анги хүртэл нь бэлдсэн юм.

Тэдгээр он жилүүдэд манай охин жинхэнэ Санта Клаусыг олж үзчих гээд, бүр уулзчих санаатай мэрийгээд байдаг сан. Даанч Санта өвөө нь “баригдаж” өгөөгүй л дээ. Хүүхдийн ертөнцийг харах цонх, гэнэн цагаан итгэл гэж эргэн тойрондоо хайр энхрийлэл дагуулж ирдэг юм билээ.

Г.ГАНЧИМЭГ