Дэлхийн Нэгдүгээр дайн дууссаны 100 жилийн ойн арга хэмжээ өчигдөр буюу Ням гарагт Францад эхэллээ. Энэхүү арга хэмжээ долоо хоног үргэлжлэх аж.

Уг арга хэмжээнд дэлхийн 80 орчим улсын удирдагчид оролцох төлөвлөгөөтэй байгаа юм байна. Франц улсад оршдог олон зуун мянган цэрэг эрс амь үрэгдсэн тулааны талбаруудад тус улсын ерөнхийлөгч Эммануэл Макрон зочлон, цуврал арга хэмжээнүүдэд оролцох юм.

Тухайлбал Вердум, Сомме зэрэг газрууд дахь тулааны талбаруудад Британий ерөнхий сайд Тереза Мэй оролцох гэж байгаа гэнэ. АНУ-ын ерөнхийлөгч Дональд Трамп, ОХУ-ын ерөнхийлөгч Владимир Путин нар Францад ирж дайн дууссаны 100 жилийн ойг тэмдэглэхийн хажуугаар богино уулзалт хийх төлөвтэй байна.

Ойн арга хэмжээний хаалт Парисын Ялалтын хаалганы дэргэд арваннэгдүгээр сарын 11-нд буюу 11 дүгээр сарын 11 дэх өдрийн 11 цагт эхлэх юм.

Уг арга хэмжээнд АНУ, ОХУ-ын удирдагч нараас гадна Германы канцлерь Ангела Меркель оролцоно. Сүүлийн жилүүдэд Исламистуудын халдлагад олон удаа өртсөн Франц улс энэ арга хэмжээг дээд зэргийн хамгаалалтын дор зохион байгуулах гэж байна.

Дэлхийн нэгдүгээр дайны ихэнх тулаанууд Франц, Бельгийн нутаг дэвсгэрт болсон байдаг. Дайны үр дүнд Оттоман, Орос, Герман, Австри-Унгарын эзэнт гүрнүүдийн үе өнгөрч, нийтдээ 16 сая орчим хүн амиа алдсан юм.