Монголын сэтгэлзүй, сэтгэц хэмжилзүйн үндэсний хүрээлэн “Олон улсын туршлага, судалгаан дээр тулгуурласан цар тахлын үеийн сэтгэлзүйн зөвлөгөө”-г олон нийтэд хүргэж байна.

1. ГЭР БҮЛДЭЭ ЗАРЦУУЛАХ ЁСТОЙ БАЙСАН ЦАГ ХУГАЦААГАА НӨХӨЖ ЧАДНА

Энэ үеийг гэр бүлийнхэнтэйгээ цагийг дурсамж дүүрэн өнгөрөөх бие биеэ илүү сайн таньж мэдэх боломж гэж харах. Гэртээ олуулаа байдаг бол карантины үеэр бие биедээ ээлжлэн ганцаараа байх цагийг олгох. Жишээ нь, олон өрөөгүй бол бие биедээ халуун вананд суух эсвэл бясалгах цаг гаргаж өгөх.

2. ОДОО Л СУРАЛЦАХ ЦАГ ШҮҮ

Карантиныг олонх хүмүүс амралт гэж бодож, өдрийг хэрхэн барах уу гэж толгой гашилгадаг. Гэвч энэ бол таны бие даан суралцах, хөгжүүлэх цаг хугацаа гэдгийг сана. Тиймээс төрөл бүрийн онлайн сургалтуудад хамрагдаарай.

3. ХҮҮХДҮҮДИЙНХЭЭ БОЛОВСРОЛД АНХААР

Карантинд байх хугацаандаа гэр бүлдээ тэр дундаа хүүхдүүддээ чанартай цаг гарган ярилцаж боловсролын хоцрогдлыг нь арилга. Хүүхдэдээ ном уншиж өгч, буцаагаад яриул. Энэ нь тэдэнд өөрийнхөө бодол санааг эмх цэгцтэй илэрхийлж сурахаас гадна өөрийгөө илэрхийлж сурахад нь тусална.

4. БУСДАД ТАВЬЖ БУЙ ХҮЛЭЭЛТЭЭ БУУРУУЛЖ, ӨӨРТӨӨ ХАТУУРХАХГҮЙ БАЙХ

Энэ үед өөртөө болон бусдад тавьдаг хүлээлтээ бууруулах хэрэгтэй. Карантин бол бидний хэвийн амьдралын үргэлжлэл учир гэрээсээ ажлаа хий.

Өөртөө болон бусад гэр бүлийн гишүүдээ хэт өндөр шаардлага тавин өөрийгөө стрессдүүлэхгүй, өөртөө хэт хатуурхахгүй байх.

5. МЭДРЭМЖЭЭ ИЛЭРХИЙЛЭХЭД СУРАЛЦАХ

Сэтгэлзүйн асуудал, өөрийн мэдрэмжээ бусдад нээж, сэтгэл доторхоо сулла. Ойр дотны хүнтэйгээ ярилцаж, мэргэжлийн сэтгэлзүйчид хандан, онлайн зөвлөгөө ав.Гэр бүлийн гишүүд мэргэжлийн сэтгэл зүйч биш ч бие биенийхээ мэдрэмжийг сонсож, ярилцах нь чухал.

6. ГҮЙЦЭД АМАРЧ ЧАДААГҮЙ МЭДРЭМЖЭЭС ТА АНГИЖИРЧ ЧАДНА.

Стресс түгшүүрийн түвшинг www.setgelsudlal.mn сайтаар дамжуулан бүртгүүлж “Стрессийн түвшин” тогтоох тестийг үнэ төлбөргүй бөглөж өөрийнхөө стрессийн түвшинг өдрөөр болон7 хоногоор хянаарай. Хэт орой унтах, хооллохоос татгалзах. Учир нь хэт орой хооллолт нь таагүй амарч чадаагүй мэдрэмж төрүүлж болзошгүй.

7. ЭРҮҮЛ МЭНДДЭЭ АНХААРАХ

Халуун ваннд хэвтэж, нүүрэндээ маск тавьж, массаж, иогхийх зэргээр биеэ амраагаарай. Мөн тогтмол дасгал хөдөлгөөн нь сэтгэл гутралд өртөхөөс сэргийлж чадна.

8. СЭТГЭЛ САНААГАА ТАЙТГАРУУЛАХ ШИНЭ ХОББИТОЙ БОЛОХ

Зураг зурах, юм оёх, шинэ хоолны жор турших гэх мэт гэртээ хийж болох шинэ хоббитой болоорой.

9. ДЭЛГЭЦИЙН ХЭРЭГЛЭЭГ ЗОХИСТОЙ ХЭМЖЭЭНД БАЙЛГАХ

Бага насны хүүхэд төдийгүй насанд хүрэгчдийн дэлгэцийн хэрэглээ зохистой түвшнээс ихэссэн нь сөрөг нөлөө авчирна. Цар тахлын үед мэдээллийг авах ганц төхөөрөмж нь гар утас хэдий ч эргүүлээд дэлгэцнээс үүдэлтэй архаг ядаргаа үүсч таны дархлааг унагаж болзошгүйг анхаараарай.

10. ЭМНЭЛЭГ, АНХНЫ ТУСЛАМЖИЙН ТАЛААР МЭДЭЭЛЭЛТЭЙ БАЙХ

Иргэд хэрвээ өөрт нь шинж тэмдэг илэрвэл өөрийгөө эмчлэхээс өмнө хаана хэнд хандах талаар мэдээлэлтэй байх.

11. ЦАР ТАХАЛ ДУУСНА. ЦААШ АМЬДРАЛ ҮРГЭЖИЛНЭ ГЭЖ ӨӨРТӨӨ ХЭЛЭЭРЭЙ.

Бусад асуудал тохиолдоод тодорхой хугацааны дараа өнгөрдөг шиг энэ үйл явдал ч мөн болоод л өнгөрнө.

12. БАТТАЙ ЭХ СУРВАЛЖААС МЭДЭЭЛЭЛ АВЧ БАЙХ

Тахлын мэдээг сонсох, унших, үзэхээс завсарлага авах. Өвчний цар тахлаас гадна /Pandemic/ мэдээлийн цар тахал /Infodemic / гэж бий. Мэдээллийн тахал бидний стрессийг улам нэмэгдүүлж байдгийг анхаарч, баталгаатай эх сурвалжаас мэдээлэл авах.

14. АРХИ, СОГТУУРАХ УНДАА, ЭМИЙН ХЭРЭГЛЭЭГ БАГАСГАХ

Алкохол болон эмийн хэрэглээг хязгаарлаж, гэрийн нөхцөлд дархлаагаа дэмжээрэй.