2025 оны наймдугаар сарын 18-аас 24-ний өдрүүдэд БНХАУ-ын Ханжоу (Hangzhou) хотод зохион байгуулагдах Asian University Basketball League (AUBL) тэмцээнд Монгол Улсын оюутны шигшээ баг оролцох тухай мэдээллийг бид өмнө нь та бүхэнд хүргэсэн билээ.

Тэгвэл тус тэмцээнд Монгол Улсыг төлөөлөн оролцох эрхийг Монголын Оюутны Сагсан Бөмбөгийн Холбоо (МОСБХ) 2024–2025 оны “Оюутны лиг”-ийн аварга баг болох Этүгэн Ирвэсүүд багт олгоод байна. Ийнхүү Этүгэн Ирвэсүүд баг Азийн спортын өндөр зэрэглэлийн тавцанд хүч үзэх хариуцлагатай, нэр хүндтэй оролцоог хүлээн аваад байгаа юм.

Этүгэн Ирвэсүүд баг нь:

“Оюутны лиг”-ийн 3 удаагийн аварга;

“Оюутны Универсиад” наадмын 2 алт, 2 мөнгө, 1 хүрэл медаль;

“Зуны лиг”-ийн 2 удаагийн аварга;

“Оргилуун лиг”-ийн нэг удаагийн аварга;

U23 УАШТ-ий 3 удаагийн аварга;

Насанд хүрэгчдийн УАШТ-ий 2 удаагийн аварга;

БНХАУ-д зохион байгуулагдсан Клубүүдийн цомын АШТ-ий аварга зэрэг дотоодын болон олон улсын тэмцээн уралдаанд тогтмол амжилт үзүүлж, эх орныхоо нэрийг олонтаа өндөрт өргөж ирсэн шилдэг баг билээ.

Эдгээр амжилтууд нь тус багийн тууштай хөдөлмөр, өндөр түвшний бэлтгэл сургуулилалт, багаар ажиллах чадварыг тод илтгэхийн зэрэгцээ Монгол Улсын Гавьяат Дасгалжуулагч О.Баярцогт багшийн ур чадвар, манлайллын үр дүн юм.

Монголын оюутны спортын холбооноос олгосон эрхийн хүрээнд тэмцээнд оролцох багийг сонгон шалгаруулах, эрхийг олгох, зохион байгуулалтын бүх ажлыг МОСБХ хариуцан хэрэгжүүлж байгаа бөгөөд цаашид оюутны лигийн аварга багийг AUBL-д тогтмол оролцуулах бодлого баримтлан ажиллахаар төлөвлөж байна.

Энэхүү оролцоо нь зөвхөн нэг багийн амжилт төдийгүй Монголын оюутны сагсан бөмбөгийг олон улсын тавцанд гаргах, хөгжлийн дараагийн шатанд хүргэх чухал алхам юм.