Авлигатай тэмцэх газрын Хяналт шалгалт, дүн шинжилгээний хэлтсээс 2025 оны есдүгээр сарын 29-нөөс аравдугаар сарын 3-ны хооронд нийтийн албанд томилогдохоор нэр дэвшсэн 442 иргэний хувийн ашиг сонирхлын урьдчилсан мэдүүлгийг шалгасан байна.

Үүнээс 306 мэдүүлгийг хянан шийдвэрлэж, 136 нэр дэвшигчийн мэдүүлгийг хянах ажиллагаа үргэлжилж байгаа аж. Хяналтын явцад тухайн ажил үүргийг гүйцэтгэхэд илт ашиг сонирхлын зөрчил үүсэх нөхцөл тогтоогдсон хоёр иргэний талаар томилох эрх бүхий албан тушаалтанд мэдэгдэл хүргүүлжээ.

Мөн өнгөрсөн долоо хоногт иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 82 гомдол, мэдээллийг хүлээн авч, тэдгээрээс 15 гомдол, мэдээллийг хянан шийдвэрлэсэн байна.

Төлөвлөгөөт хяналтаар 26 албан тушаалтны хувийн ашиг сонирхлын болон хөрөнгө, орлогын мэдүүлгийг хянан шалгав хэмээн Авлигатай тэмцэх газраас мэдээллээ.