“Орфей” постдрамын театр энэ намар цагийн үзвэрийн нээлтээ ОХУ-ын Тува Бүгд Найрамдах Улсын нийслэл Кызыл хотын Үндэсний их театрт хийлээ.

Энэ удаагийн намрын нээлт анх удаа Хятадын орчин үеийн сонгодог зохиолч болон Монгол найруулагчийн бүтээлээр, Орос, Тува жүжигчдийн оролцоотойгоор тува хэлээр тайзнаа амилсан нь түүхэн ач холбогдолтой үйл явдал боллоо.

Тувагийн Үндэсний их театр нь 100 орчим жилийн түүхтэй, барилга байгууламж, технологийн дэд бүтэц, уран бүтээлчдийн чадвар чансаагаараа Азидаа тэргүүлэгч театрын нэг бөгөөд дэлхийн шилдэг найруулагч, зохиолч, зураач, жүжигчидтэй хамтран ажиллаж ирсэн баялаг уламжлалтай уран бүтээлийн төв билээ.

Тус жүжгийн найруулагчаар М.Батболд, продюсероор Т.Ариунчимэг ажиллаж буй.

Мөн

• Зохиолын драмчилсон хувилбар: Мө.Баятбаяр
• Ерөнхий зураач: О.Баярмагнай
• Хөгжмийн зохиолчид: О.Нямхүү, Х.Сэцэн нар ажиллажээ.