Улсын Хоёрдугаар төв эмнэлгийн мэдрэл судлалын тасгийн их эмч Д.Уянгатай тархины харвалтын талаар ярилцлаа.

---

-Тархины харвалт гэж юу вэ?

-Мэдрэлийн эмч нар болон эрүүл мэндийн байгууллагууд тархины харвалтад онцгойлон анхаардаг. Яагаад гэвэл харвалт гэдэг нь өөрөө маш хүнд, ноцтой өвчин юм. Тухайн хүн тахир дутуу болох ч эрсдэлтэй. Хүний тархинд судас хагарч, бөглөрснөөс үүдэн ухаангүй, хэл яриагүй болох шинж илэрдэг. Нэг ёсондоо тархины цусны эргэлтийн цочмог хямрал гэж ойлгож болно.

-Яагаад хүн тархины харвалтад өртдөг вэ. Нөлөөлөгч хүчин зүйлийнх нь талаар ярихгүй юу?

-Аливаа өвчин өөрийн гэсэн шалтгаантай байдаг. Харвалтын хувьд засагдаж болох, болохгүй гэсэн хоёр шалтгаантай. Тухайн хүний нас, хүйс, удамшил, өмнө нь харваж байсан эрсдэлүүд засагдах боломжгүй шалтгааны тоонд ордог. Харин засаж болох шалтгааны хувьд архи, тамхины хэрэглээ, стресс, хөдөлгөөний дутагдал, артерийн даралт ихсэх өвчин, чихрийн шижин, сахараа хянаагүй гэх мэтчилэн байна

Тиймээс харвалтаас урьдчилан сэргийлэх арга нь өөрөө шалтгаантайгаа нягт холбоотой. Өөрөөр хэлбэл, хөдөлгөөний дутагдалд орохгүй, архи тамхины хэрэглээгээ багасгаж, сахараа хянахад болно. Нэмж хэлэхэд сайн унтаж, амарч, даралтаа хянаж байх хэрэгтэй. Манайхан даралтаа хянахгүй, эмээ уухгүй яваад байх хандлага ажиглагддаг. Энэ нь тухайн хүн харвах эрсдэлийг тээгээд явж байна гэсэн үг.

-Манай усад тархины харвалтын нөхцөл байдал ямар байна вэ?

-Дэлхийн эрүүл мэндийн байгууллагаас нэг жилд 100 мянган хүн амд 100-300 хүн харвалтад өртөж байна гэх судалгаа хийсэн байдаг. Манай улсын хувьд 100 мянган хүн амд гэж бодохоор нэг жилд 280-290 хүн өртөж байна. Энэ тоо бол маш өндөр үзүүлэлт шүү. Түүнчлэн дэлхий даяар хоёроос гурван секунд тутамд нэг хүн харвалтад өртөж байна гэх судалгаа ч бий. Ялангуяа 75 наснаас дээш таван эрэгтэй тутмын нэг, зургаан эмэгтэй тутмын нэг нь харвалтад өртөх эрсдэлтэй гэдэг. Харин эрэгтэйчүүд эмэгтэйчүүдээс 25 хувиар илүү тархины харвалтад өртөх эрсдэлтэй. Үүний шалтгаан нь нөгөө л архи, тамхины хэрэглээ байдаг.

 

А.Даваа