Залуу төгөлдөр хуурч, төгөлдөр хуурын багш Б.Ичинхорлоо энэ оны турш эх орныхоо нэрийг олон улсад өндөрт өргөсөн онцгой үйл явдлуудаар дүүрэн байна. Тэрээр өнгөрсөн 9-р сарын 13-нд Сан Францискогийн алдарт Golden Gate Park-д зохион байгуулагдсан АНУ-ын хамгийн том урлагийн наадам болох “Flower Piano”-д хоёр дахь жилдээ урилгаар оролцож, Төрийн шагналт хөгжмийн зохиолч Б.Шаравын “Сэтгэлийн эгшиг” бүтээлийг тоглосон нь Монголын бүтээл анх удаа тус наадмын тайзнаа эгшиглэсэн түүхэн мөч болсон юм. Мөн шавь нар нь 6–8 дугаар сард болсон San Francisco International Piano Competition-д амжилттай оролцож, дэлхийн өнцөг булан бүрээс авьяаслаг хүүхдүүдийг нэг дор цуглуулдаг нэр хүндтэй тэмцээний тайзнаа ур чадвараа харууллаа. Тодруулбал, түүний 5 настай шавь Э.Лүнг нэгдүгээр байр, Б.Энгүүн гуравдугаар байр эзэлж, олон улсын хэмжээнд онцгой амжилт гаргасан юм. Эдгээр амжилтыг үнэлж, Соёлын сайд Ч.Ундрамын тушаалаар Б.Ичинхорлоог Соёлын яамны “Жуух бичиг”-ээр шагнасныг Сан Франциско хот дахь Монгол Улсын Ерөнхий консулын газрын тэргүүн Б.Мөнхбаатар 2025 оны 8 дугаар сарын 24-ний өдөр гардуулан өглөө. Мөн Ерөнхий консул авьяаслаг хүүхдүүдийг хүлээн авч уулзан, тэдний хичээл зүтгэлийг үнэлж, өргөмжлөл гардуулсан талаар Сан Франциско хот дахь Монгол Улсын Ерөнхий консулын газрын албан ёсны цахим хуудсанд мэдээлжээ. Одоогоор Б.Ичинхорлоо Сан Франциско хотын төгөлдөр хуурын сургуульд ахлах багшаар ажиллаж, Калифорнийн Хөгжим Багш нарын Холбоо (MTAC)-ны Удирдах зөвлөлийн гишүүнээр сонгогдон ажиллаж байна. Мөн Хойд Америкийн өсвөрийн төгөлдөр хуурчдын олон улсын тэмцээнд шүүгчээр ажиллаж, ирээдүйн авьяастнуудыг дэмжин хөгжүүлэх үйлсэд өөрийн хувь нэмрээ оруулсаар байна.