“Токио-2025” Зуны XXV дахь Дифлимпийн наадам өчигдөр хаалтаа хийлээ. 11 өдрийн турш Японы Токио хотод үргэлжлэн явагдсан тус наадамд 81 орны 3200 гаруй тамирчин 21 спортын төрөлд шилдгүүдээ тодрууллаа. Монгол Улсаас жүдо, чөлөөт бөх, ширээний теннис, хөнгөн атлетик, буудлага спортын төрөлд 14 тамирчин оролцож, хоёр хүрэл медаль хүртэн багийн дүнгээр 47-р байрт жагслаа. Манай улсаас чөлөөт бөхийн төрөлд Н.Эрхэмбаяр, Д.Чинзориг нар хүрэл медаль хүртсэн юм.

“Токио-2025” наадмыг Украины баг тамирчид 32 алт, 39 мөнгө, 29 хүрэл, нийт 100 медаль хүртсэн амжилтаар тэргүүлсэн бол зохион байгуулагч япончууд 16 алт, 12 мөнгө, 23 хүрэл медаль хүртжээ. 54 орон ямар нэгэн медаль хүртсэнээс 36 орон аваргын алтан медальтай буцлаа. Монголын баг энэ удаагийн наадамд хоёр хүрэл медальтайгаар Аргентин, Белги, Хонконг, Филиппин, Тайланд зэрэг орны урд 47-р байрт жагслаа.

Дифлимп бол зөвхөн өрсөлдөөн бус, харин итгэл, урам зориг, өөртөө итгэх боломжийг бүтээх, сонсголгүй иргэдийн хэл соёлыг спортоор дамжуулан олон улсад таниулах хөдөлгөөн юм. 1924 онд Францын нийслэл Парис хотод сонсголын бэрхшээлтэй иргэдийн анхдугаар олон улсын тэмцээн “International Silent Games” нэртэйгээр зохион байгуулагдсан түүхтэй.