Ноднин жилийн УИХ-ын сонгуулийн дүнгийн дараа хэд хэдэн хүнийг овоо ажил хйих болов уу хэмээн ард түмэн харж, ярьж байсны нэг нь Б.Заяабал гишүүн юм. Тэр дундаа Татварын ерөнхий газрыг удирдаж байсан болохоор нь татвартай холбоотой хуулиудыг өөрчилж, ард түмнийг сөхрүүлж байгаа татварыг бууруулах тал дээр манлайлж ажиллах байх гэж байсан. Гэвч тэгсэнгүй, одоогоор зөвхөн намынхаа даргад, намынхаа төлөө л ажиллаж байна. Ямар сайндаа МАН-ын сандал суудлын төлөөх хэрүүлд оройлон оролцож, бүр сүүлдээ П.Сайнзориг гишүүний биед халдсан тухай мэдээлэл ч тухайн үед хэвлэлээр гарч байлаа.

Уг нь тэрбээр 2016 оноос хойш өнөөдрйиг хүртэл ямар төрлийн татвар хэдэн хувиар нэмэгдсэн, татвар нэмэгдсэн нь олон нийт, аж ахуйн нэгжүүдийг хэрхэн сөхрүүлж байгааг хамгийн сайн мэдэх хүн. Учир нь Б.Заяабал гишүүн 2016-2019 онд Татварын ерөнхий газрын дэд дарга, 2019-2024 онд даргаар нь ажиллаж, ёстой л энэ байгууллагад хадаастай байсан нэгэн. Харамсалтай нь өнөөдрийн байдлаар 2016 оноос хойш татвар 80 хувиар өссөн гэсэн судалгаа гарсан байна лээ. Мөн 320 мянга гаруй иргэн, аж ахуйн нэгж нийтдээ 6.5 их наяд төгрөгийн татварын өртэй байгаа гэх мэдээлэл ч бий. Тийм учраас арга ядаад Ардчилсан намын зүгээс нэг удаагийн өршөөлийн хууль буюу Эдийн засгийн эрх чөлөөний тухай хуулийн төслийг боловсруулж байгаа гэдгээ мэдэгдсэн. Энэ тухай УИХ-ын гишүүн Б.Жаргалан “МАН удаа дараалан Нийгмийн даатгалын шимтгэл, газрын төлбөр гээд бүх татварыг нэмснээр сүүлийн зургаан жилийн дотор иргэдийн төлсөн татвар гурав дахин нэмэгдсэн” хэмээн хэлсэн. Тэгэхээр энэ бүх татварын дарамт, өр төлбөрийн хуримтлал үүсч, аж ахуйн нэгжүүд хаалгаа барьж байгаа нь Б.Заяабал гишүүнтэй шууд холбоотой гэж үзэж болохоор санагдана. Учир тэр дээр хэлсэнчлэн татварын байгууллагыг найман жил удирдсан. Энэ салбарын сайн муу, сайхан муухайг бүгдийг нь мэднэ. Юуг засаж залруулбал иргэд, аж ахуйн нэгжид ээлтэй байхыг ч мэдэж байгаа гэсэн үг. Харамсалтай нь Их хурлын гишүүний зөөлөн сэнтийд тухалснаасаа хойш юу ч хийсэнгүй өнөөдрийг хүрлээ.

М.Зул