Аж үйлдвэрийн салбарын үйлдвэрлэл энэ оны эхний 11 сарын урьдчилсан гүйцэтгэлээр 47.1 их наяд төгрөг болж, өмнөх оны мөн үеийнхээс 1.6 хувь буюу 753.7 тэрбум төгрөгөөр өсжээ.

Үүнд боловсруулах аж үйлдвэр 9 хувь буюу 614.6 тэрбум, цахилгаан хий, уур, агааржуулалтын салбар 33.6 хувь буюу 605.1 тэрбум төгрөгөөр нэмэгдсэн нь нөлөөлсөн байна.

Боловсруулах аж үйлдвэрийн салбарын үйлдвэрлэл энэ оны эхний 11 сарын урьдчилсан гүйцэтгэлээр 7.5 их наяд төгрөг болж нэмэгдэхэд хүнсний бүтээгдэхүүн үйлдвэрлэлийн салбар 17.6 хувь буюу 371.5 тэрбум, төмөрлөг бус эрдэс бодисоор хийсэн эдлэл үйлдвэрлэлийн салбар 20.5 хувь буюу 138.2 тэрбум төгрөгөөр нэмэгджээ.

Уул уурхай, олборлох аж үйлдвэрийн салбарт хүрэн нүүрс, цайр, төмрийн хүдрийн баяжмал, хайлуур жонш, төмрийн хүдэр, зэсийн баяжмал металл агуулгаараа, хайлуур жоншны баяжмалын биет хэмжээ өмнөх оны мөн үеийнхээс 3.6-66.6 хувиар нэмэгдэж, цэвэршүүлээгүй алт, чулуун нүүрс, газрын тос, мөнгөний баяжмал 1.1-35.4 хувиар багасжээ. Боловсруулах аж үйлдвэрийн салбарт шингэн сүү, катодын зэс, цемент, гурил, шохой, самнасан ноолуур зэрэг гол нэр төрлийн бүтээгдэхүүний үйлдвэрлэлийн биет хэмжээ өмнөх оны мөн үеийнхээс 2.9-3.4 дахин өсөж, харин малын мах, металл бэлдэц, ус, ундаа жүүс, цагаан архи, ноолууран сүлжмэл эдлэл, цэвэр спирт,  тамхи, нүүрсэн шахмал түлш зэрэг бүтээгдэхүүний үйлдвэрлэл 0.6-49.2 хувиар багаслаа. 

Аж үйлдвэрийн салбарын борлуулсан бүтээгдэхүүн энэ оны эхний 11 сарын урьдчилсан гүйцэтгэлээр 51.8 их наяд төгрөг болж, өмнөх оны мөн үеийнхээс 9.5 хувь буюу 4.5 их наяд төгрөгөөр нэмэгдэхэд уул уурхайн салбарын борлуулалт 7.4 хувиар буюу 2.7 их наяд төгрөгөөр нэмэгдсэн нь нөлөөлсөн байна.

Гадаад зах зээлд энэ оны эхний 11 сарын урьдчилсан гүйцэтгэлээр 36.4 их наяд төгрөгийн борлуулалт хийсний 34.6 их наяд нь уул уурхай, олборлох салбарын борлуулалт байв. Уул уурхайн бүтээгдэхүүний гадаад борлуулалтын 37.6 хувийг нүүрс, 58.5 хувийг металлын хүдэр, 2.4 хувийг газрын тос, 1.4 хувийг бусад ашигт малтмал олборлолтын салбар эзэлжээ.