Он гарсаар эхний дөрвөн сард манай улсын экспортын орлого 4.2 тэрбум ам.доллар болж, өмнөх оны мөн үеэс 695 сая ам.доллароор буюу 14.1 хувиар буурсан байна.

Монгол Улс энэ оны эхний дөрөвдүгээр сард нийт 135 улстай худалдаа хийж, гадаад худалдааны нийт бараа эргэлт 7.8 тэрбум ам.долларт хүрсэн байна. Үүнээс экспорт 4.2 тэрбум ам. доллар, импорт 3.6 тэрбум ам.долларт хүрч, тэнцэл 683 .2 сая ам. долларын ашигтай гарчээ. Нийт бараа эргэлтийн хэмжээ өмнөх оны мөн үеэс 562.0 сая ам.доллар, экспорт 695.0 сая ам.доллар, тэнцэл 827. 9 сая ам.доллароор тус тус буурсан байна. Харин импорт 132 .9 сая ам. доллароор өсжээ.

Экспортын орлого буурахад нүүрсний экспорт гол жин дарсныг Үндэсний статистикийн хороо мэдээллээ. Тухайлбал, нүүрс 1.2 тэрбум ам.доллар, боловсруулаагүй газрын тос 25.5 сая ам.доллар, хонь, ямааны мах 20.2 сая ам.доллар, төмрийн хүдэр, баяжмал 13.5 сая ам.доллар, мал, амьтны самнасан үс, хялгас 10.5 сая ам.доллароор тус тус буурсан нь голлон нөлөөлжээ. Харин зэсийн хүдэр ба баяжмал 501. 8 сая ам.доллар, жоншны хүдэр ,баяжмал 32.5 сая ам.доллар, цайрын хүдэр, баяжмал 31.2 сая ам.доллароор өссөн байна.

Харин импорт өмнөх оны мөн үеэс 132.9 сая ам.доллароор өсөхөд суудлын автомашин 109.5 сая ам.доллар, тээврийн хэрэгслийн сэлбэг, эд анги 20.4 сая ам. доллар, гар утас 15.9 сая ам.доллар, согтууруулах ундаа 9.9 сая ам.доллар, тунгаар савлагдсан эм 6.2 сая ам.доллароор тус тус өссөн нь голлон нөлөөлжээ.