Хаврын чуулганаар Л.Оюун-Эрдэнийн тэргүүлсэн Засгийн газрыг огцруулсан. Энэ шийдвэрийг анх Монгол ардын намын Бага хурал гаргасан. Гэвч Засгийн газар огцроогүй. Улмаар асуудал цааш явсаар УИХ дээр энэ асуудал хэлэлцэгдэж, Ерөнхий сайдад итгэл үзүүлэхгүй гэж шийдсэнээр Засгийн газар унасан. Гэхдээ энэ бүх зүйл хуулийн дагуу л явсан. Бүр нарийн ярьвал чуулганы хуралдаанд оролцсон гишүүдийн дийлэнх нь итгэл үзүүлнэ гэж санал өгч байв. Даанч чуулганы хуралдаанд оролцоогүй Ардчилсан намын санал эсрэг саналаар бүртгэгдсэн учраас огцорсон юм. Хэрэв АН-ынхан чуулгандаа суусан бол Засгийн газраа аваад үлдэх бүрэн боломж байсан. Гэсэн хэдий ч энэ бол Монголын улс төрд сүүлийн үед гарсан хамгийн сайн, том жишиг болсон. Учир нь аль нэг нам засаг төрөөр оролдохгүй, оролдож чадахгүй болсон гэдгийг яруу тодоор харуулсан кэйс. Хуулиараа УИХ Засгийн газрыг томилдог. Огцруулах эсэхийг ч тэд л мэднэ. Тийм ч болохоор УИХ-ын дээрх шийдвэр бол засгаа томилсон байгууллага нь засгаа мэднэ ээ гэдгийг манайхны эрээвэр хураавар намчингууд, худлаа үнэн жагсаал цуглаан зохион байгуулагчид, сэм хуйвалдаанаар ямар нэгэн дарангуйллын шинжтэй систем тогтоох гэж санаархагчдад маш хатуугаар мэдэгдсэн шийдвэр болсон юм. Үүнийг тодорхойлон дурдаад байгаагийн учир шалтгаан нь саяхан сошиалаар Нийслэлийн Засаг дарга бөгөөд Улаанбаатар хотын захирагч Х.Нямбаатарыг огцруулах нь, тэр эрүүл мэндийн шалтгаанаар ажлаа өгөх нь гэсэн мэдээлэл түгсэн. Ийм яриа гарсан байхыг үгүйсгэхгүй. Нам дотор нь ч хотыг өөрийн болгох гэсэн, тэнд очиж эзэн суух битүүхэн хүсэлтэй дурны хонгионууд бий. Тэдний зүгээс нийгмийг тандах гэж зориудаар сэвсэн ч биз. Түүнээс биш хотын даргыг яг одоохондоо яасан гэж огцруулах гээд байгаа юм. Мэдээж, машины татварыг нэмсэнд нь нийслэлийн иргэдийн олонх нь дургүйцэж байгаа. Гэхдээ бөөнөөрөө наадам хэсэж, найрлаад явчихсан энэ цаг үед ганц ажил хийж байгаа нь Х.Нямбаатар л байна шүү дээ. Долоогоод байгаа юм биш, бодит үнэн нь тийм байна. “Хариуцсан хүн нь амралтаа авсан” гэдэг хариулт сонсдог цагт муу, сайн хэлүүлээд тэр л ажил хийж байна. Худлаа гэвэл гараад хотынхоо хэдэн замыг зассан байгааг нь л харчих хэрэгтэй.

Хотын даргыг суудлаас нь буулгая гэж хоёр өвгөн хоорондоо ярилцаж, эсвэл улс төрийн хүрээнд хэдэн нөхөр сэмхэн шивнэсэн байж болно. Гэвч Монгол Улсын засаг захиргаа нутаг дэвсгэрийн нэгж түүний удирдлагын тухай хууль болоод бусад холбогдох хууль журмуудын дагуу хотын даргыг огцруулах эсэхийг зөвхөн нийслэлийн Иргэдийн төлөөлөгчдийн хурал л мэднэ. Энэ бол хотынхоо иргэдийг төлөөлж байгаа 45 төлөөлөгчид хуулиар олгогдсон эрх, үүрэг нь юм. Өөр хэн ч гадна талаас нь шүлсээ үсчүүлээд нэмэргүй гэдгийг дээрх Засгийн газрын кэйс харуулж байна.

Бүр тодорхой тайлбарлах юм бол Засгийн газрынхаа хувь заяаг тэднийг томилсон УИХ л нь мэдсэн дээрх жишээ шиг зүйл л дээ. Яг үүн шиг Х.Нямбаатарыг орон нутгийн сонгуулиар нийслэлд сонгогдсон төлөөлөгчид хотын даргаар томилсон. Тэгэхээр огцруулах эрх нь ч тэдэнд л бий. Дээрээс нь одоогийн нөхцөлд хотын дарга огцортол өдий. Хэрэв асуудал ямар нэгэн байдлаар НИТХ дээр очлоо гэхэд хэлэлцэх нь бүү хэл, ярих ч хүн бараг олдохгүй байх. Ийм байдлыг бид өөрсдөө жил хүрэхгүй хугацааны өмнө бий болгосон юм.

Өнгөрсөн удаагийн орон нутгийн сонгуулиар нийслэлд МАН бараг түүхэндээ байгаагүй ялалт байгуулсан. Тэнд 45 суудлын 40-ийг нь авсан. Сонгуульд оролцсон иргэдийн олонх нь ингэж шийдсэн. Хотоо МАН-аар энэ дөрвөн жилд удирдуулаад, хөгжил цэцэглэлтэд хүрье гэж сонгогчид шийдээд нийслэлийн сонгуульд шуураад л тэднийг сонгосон. Яагаад ингэж шийдсэнийг одоо хүртэл гайхаад л байгаа. Ямар 1990-ээд оны өмнөх дүр төдий сонгууль байгаа биш дээ. Ардчилсан улсад баймгүй л үр дүн гарсан. Хотод МАН ялдаг л юм байгаа биз. Гэхдээ АН болон бусад намаас хүчтэйхэн сөрөг хүчин хийчихмээр хэмжээний төлөөлөгч сонгочихож болоогүй юм байхдаа гэж бодогдоод л байдаг юм. Яг үүн шиг хэрвээ Х.Нямбаатарт улаанбаатарчууд хуйгаараа дургүй юм бол яах гэж МАН-ынхныг сонгосон юм. Та бүхний саналаар л тэд сүүлийн хэдэн сонгуульд дараалан ялалт байгуулж байгаа биз дээ. Дээрээс нь маш олон хүн “Санал өгөх хүн байхгүй” гэсэн шалтгаанаар сонгуульдаа оролцоогүй. Одоо ийм улиг болсон зүйлээ болих хэрэгтэй. Тэгээд ч сонгууль гэдэг хэн нэгэн хүн гэхээсээ илүүтэй цаад улс төрийн хүчнийг нь харж байж шийдвэрээ гаргадаг зүйл. Учир нь олон түмний хайр хүндлэлийг хүлээсэн нэг нөхөр ганцаараа улс, хот удирдаад, бүхнийг хийгээд байдаггүй. Эцсийн бүх шийдвэрийг хамтаараа гаргаж, ял, гавьяа хоёрыг нь ч намаараа л хүлээдэг зүйлийг сонгууль гэдэг. Гэтэл өөрсдөө л ийм сонголт хийчихээд одоо нийтээрээ гонгиноод байж яах юм. Одоо нэгэнт өнгөрсөн, бүх зүйл шийдэгдсэн. Тиймээс одоогийн нийслэлийн захирагчаа тултал нь, ёстой л чөмгийг нь дундартал ажиллуулах хэрэгтэй. Түүнээс биш өөр нэгнээр солиод хугацаа л алдана. Түүнээс үүдэн гарах муу үр дагаврыг нь нийслэлчүүд бид л амсана.