Ардын уран зохиолч Б.Лхагвасүрэнгийн “Дутуу хээтэй тооно” жүжгийн зохиолоос сэдэвлэн бүтээгдсэн “Задлаагүй захиа” уран сайхны киноны нээлт нэгдүгээр сарын 15-нд болохоор товлогджээ. Өмнө нь үзэгч олны хайр хүндэтгэлийг уран бүтээлээрээ хүлээсэн “Аранжин” пикчерсийн “Шар гэгээ” уран сайхны киноны баг хамт олон энэхүү киног бүтээжээ.

10 гаруй жилийн хугацаанд орон нутгийн театруудад монгол орныхоо өв соёлыг түгээн ажиллаж байгаад сүүлийн жилүүдэд кино урлагт цахиур хагалан орж ирж буй чадварлаг найруулагч Б.Батдэлгэрийн энэхүү бүтээл кино сонирхогчдын дунд өндөр хүлээлт үүсгээд байна. Найруулагч Б.Батдэлгэрийн өмнөх бүтээл болох “Шар гэгээ” киног Төрийн соёрхолт, Соёлын гавьяат зүтгэлтэн Ш.Гүрбазарын зохиолоор хийж байсан бол энэ удаа Ш.Гүрбазарын багш Хөдөлмөрийн баатар, Ардын уран зохиолч Б.Лхагвасүрэнгийн зохиолыг сонгосон нь олон хүний анхаарлыг татаж байна.

Тэрбээр кино уран бүтээлдээ оролцох дүрийн сонгон шалгаруулалтыг их няхуур хийдэг гэдэг нь энэ удаагийн дэлгэцийн бүтээлээс нь ч харагдана гэдгийг хамтран ажилласан уран бүтээлчид нь хэлж байв. Учир нь найруулагч Б.Батдэлгэр 21 аймгаас дүрийн сонгон шалгаруулалт зарлаж эрж хайсны эцэст  Монгол орны баруун хязгаар Увс аймгаас гол дүрээ олсон гэнэ. Энэ мэт жүжигчдийн онцгой сонголт нь түүний кино болгондоо олонд танигдаагүй шинэ дүр төрхийг гаргаж ирэх боломжийг илүү нээж өгдөг байж магадгүй юм. Харин энэ удаа ямар шинэлэг дүрүүдээр жүжигчдийн багаа бүрдүүлснийг “Задлаагүй захиа” киноноос харах үлдлээ.