-ШҮҮХ ХУРЛЫГ ЭНЭ САРЫН 21-НД ХИЙХЭЭР ТОВЛОЛОО-

Сэжиглэгдэн шалгагдаж байгаа Д.Жавхлан, М.Амарболд нар

Баянзүрх дүүргийн 21 дүгээр хорооны нутаг дэвсгэрт байрлах “Очир” төвийн зочид буудлын өрөөнд өнгөрсөн 2017 оны наймдугаар сарын 22-23-нд шилжих шөнө 13 настай охин бусдын гарт амиа алдсан хэрэг гарсан. 13 настай охиныг онц хэрцгийгээр хөнөөсөн хэрэгт Д.Жавхлан, М.Амарболд нарыг сэжиглэн шалгаж байгаа. Дээрх хэргийг шүүх хурлын урьдчилсан хэлэлцүүлэг өчигдөр Баянзүрх дүүргийн Эрүүгийн хэргийн анхан шатны шүүхэд болсон юм. Хохирогч талын хууль ёсны төлөөлөгчөөр талийгаач охины аав Г.Лхагвасүрэн, өмгөөлөгчөөр Р.Булгамаа, Г.Батбаяр, шүүгдэгч талын өмгөөлөгчөөр С.Оюунцэцэг, О.Цэрэнпунцаг нар оролцсон юм. Шүүх хурлын танхимын гадна хохирогчийн ар гэрээс талийгаачийн эмээ С.Оюунцэцэг, ээж С.Баясгалан, өвөө Ц.Тэрээдэй нар ирсэн байв. Онц ноцтой хэрэгт сэжиглэгдэн шалгагдаж байгаа Д.Жавхлан, М.Амарболд нарыг шүүх хурал өнгөрөгч зургадугаар сард Баянзүрх дүүргийн шүүхэд болж, хэргийг нэмэлт мөрдөн байцаалтад буцаах шийдвэр гарсан юм. Тухайлбал, Баянзүрх дүүргийн Эрүүгийн хэргийн анхан шатны шүүх Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1.2-д “Шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх” гэх үндэслэлээр прокурорт буцаасан юм. Урьдчилсан хэлэлцүүлгээс анхан шатны шүүх хурлын тов гарах юм. Шүүх хуралдаанаар яллагдагч нарын өмгөөлөгчөөс гаргасан хүсэлтийн зарим хэсгийг хангаж, яллагдагч Д.Жавхлан, М.Амарболд нарыг шүүхэд шилжүүлж, тэдэнд холбогдох эрүүгийн хэргийн шүүх хуралдааныг 2018 оны арваннэгдүгээр сарын 21-ний өдрийн 10.00 цагт хийхээр товлолоо. Тус шүүх хуралд шинжээчийн багийн ахлагчийг шүүх хуралд оролцуулахаар боллоо.

Талийгаач охины аав Т.Лхагвасүрэн: Хэрэг хийсэн этгээдүүдэд шүүхялын дээд хэмжээг оноохёстой

Талийгаач охины аав Т.Лхагвасүрэн “Шүүх эмнэлгийн дүгнэлтээр манай охин архинд хордож нас барсан. Ходоод болон уушгинаас нь нэлээн их хэмжээний архи гарсан гэж шүүх эмнэлгийн дүгнэлтэд бичигдсэн байсан. 5.7 хувийн промил спирт бүхий архийг миний охин өөрөө уух боломжгүй гэдгийг энэ дүгнэлт нотолж байгаа юм. Тиймээс манай охиныг өөрөө архи уусан уу, хамт байсан этгээдүүдийн дарамт шахалтад орж, хүчээр архи уусан уу, хичнээн хэмжээний архийг ууснаар уушгинд нь орох вэ гэх шалтгааныг Хор судлалын үндэсний төвөөр шинжлүүлж, тогтоолгохоор болсон. Иймээс хэргийг прокурорт буцаасан. Шүүхийн шинжилгээний үндэсний хүрээлэнгийн эмч охиныг минь “үзэгдэх шүдгүй” гэсэн дүгнэлтийг өнгөрсөн есдүгээр сард гаргасан. Тухайн үед н.Долгормаа гэдэг эмчээр ахлуулсан баг байсан. Тус багийнхны гаргасан шинжээчийн дүгнэлтээр “үзэгдэх шүдгүй” гэсэн. Бид дахин шинжилгээ хийлгэе гэсэн хүсэлт гаргасан. Ингээд шинэ баг томилж шинжилгээ хийлгэсэн. Хавтаст хэрэгт авагдсан материалын зурагнаас харахад үүдэн шүд нь бүгд байна гэсэн дүгнэлт гарсан. Өөрөөр хэлбэл, миний охины шүдийг эхлээд “байхгүй” гэсэн. Дараа нь “байгаа” гэсэн дүгнэлт гарч ирсэн. Харин бидэнд одоо араа буюу ар талынх нь шүднүүд байсан юм болов уу гэдэг эргэлзээг үүсгэж байгаа. Шүүх хурал дээр хяналтын прокурор “шүдгүй” гэсэн дүгнэлтийн тухайд шүүх эмнэлгийн эмч нар алдаа гаргасан гэдгээ хүлээн зөвшөөрсөн гэж хэлсэн. Бид нар энэ бүх эргэлзээтэй нөхцөл байдлуудыг нэг мөр шийднэ. Энэ ч үүднээс бид цоо шинэ өөр эмч нарын багаар шинжилгээ хийлгэх хүсэлт гаргасан. Миний охины амь насыг хөнөөсөн гэмт хэрэгтнүүд болох М.Амарболд нь манай хашааны дээд талд амьдардаг. Д.Жавхлан нь манай хашааны доод талд байдаг. Шүүх хурлын урьдчилсан хэлэлцүүлгийн байдлаас уг хоёр этгээдийг ажиглахад ямар ч гэмшсэн шинжгүй байна лээ. Огт хэрэг хийгээгүй мэт царай гаргаж байсан. Уг хоёр этгээд яг ямар мэдүүлэг өгсөн гэдэг нь хавтаст хэргийн нууц юм. Д.Жавхлангийн өвөөг Нямдорж гэдэг. Энэ хүн урьдчилсан хэлэлцүүлэг явагдах үеэр гадаа ёс бус зан ааш гаргасан. Тухайлбал, “би 16 сая төгрөгөөр өмгөөлөгч хөлсөлж авсан. Тэглээ гээд яах юм бэ, та нар юу олж авах юм бэ, юу олж авахыг чинь харъя” гэсэн. Үр хүүхдээ алдчихсан эхнэр минь сэтгэл санааны хүнд байдалд байгаа. Маш их шаналал зовлонтой байхад эхнэрийг гутаан доромжилж, салаавч гаргасан. Элдэв бусын үгээр доромжилсон. Үүнээс харахад Жавхлангийн ар гэр нь ёс бус зан ааштай хүмүүс юм билээ. Зүгээр байсан үр хүүхдийг минь хуурч мэхлээд зочид буудалд дагуулж очиж, амь насыг нь хөнөөчихөөд ямар ч гэмшсэн шинжгүй. Бүр илт янз бүрийн авир гаргаж буй нь ямархуу хүмүүжилтэй, зан ааштай вэ гэдэг нь харагдсан л даа. М.Амарболдын гэр бүл, өмгөөлөгчид нь ч гэсэн ёс бус үйлдэл, авир гаргасан. Бидэнд байнгын сэтгэл зүйн дарамт үзүүлдэг. Хүний урманд уучлаарай гэдэг үгийг ч хэлээгүй. Охины маань оршуулгын зардалд огт нэмэр тус болоогүй. Ийм л хүн чанаргүй юм билээ. Би үр хүүхдээрээ хохирчихлоо. Хэрэг хийсэн хүмүүс амьд байна. Хэргийг үйлдсэн хүмүүс шоронд хоригдоод л хэдэн жилийн дараа гараад ирнэ. Миний бодол Монголын шүүх үнэн зөвөөр тохирсон ялыг нь оноож өгөөсэй. Ийм л хүсэлтэй байна. Хамгийн дээд хэмжээний ял өгөх байх гэсэн бодолтой байгаа. Манай гэр бүлд маш их гарз хохирол учирсан. Бидний сэтгэл санаа маш хүнд байгаа. Охиноо нутаглуулах үед хамаг байдгаа л гаргаж, зориулсан. Хүний эрхийг хангагч шүүх эрх мэдлийн байгууллага, үнэн бодитой шийдвэр гаргаж, олон хүний хуулийн байгууллагад итгэх итгэлийг бэхжүүлж өгнө гэдэгт найдаж байна. Амьдын там болсон ийм зүйл өөр гэр бүлд бүү тохиолдоосой билээ” хэмээн мэдэгдсэн юм.

Г.Батзориг