Улмаар өмнөх хоёр удаагийн барилдаанд дүн шинжилгээ хийн “Алтан Цом”-ын барилдааныг хоёр жилд нэг удаа зохион байгуулах, аймгуудын бөхийн тоо, салбар холбоо, дэвжээдийн бүтэц, зохион байгуулалт, бэлтгэлжилт зэргээс шалтгаалан хэсгийн барилдаануудын өрсөлдөөн бага байсныг өөрчлөн, ижил түвшиний бөхчүүдээр бүрдүүлсэн үндэсний томоохон компаниудын нэр дээр “Шилдэг 8 баг” оролцох зохион байгуулалтын ажлууд төлөвлөгөөний дагуу хийгдэж байгаа аж.

МҮБХ-ны 2024 оны есдүгээр сараас 2025 оны есдүгээр сар хүртэлх хугацаанд зохион байгуулсан нийт 68 удаагийн барилдаанд гаргасан бөхчүүдийн амжилтыг чансааны оноогоор дүгнэн 8 багийн гишүүдийг бүрдүүлэх юм байна.  МҮБХ нь багуудын өрсөлдөөнийг хэт ялгамжтай байлгахгүй, өрсөлдөөн сонирхол татахуйц байлгах үүднээс үндэсний компаниудад 1-3 бөхийг шууд сонгох (үүнд цалин, ивээн тэтгэлэг, харьяалал болон өндөр чансаатай байгаа бөхчүүдийг урих эрх), багийн бусад гишүүдийг чансааны үзүүлэлтийн 1-8 байр тус бүрээр сугалуулах зарчмаар багийн гишүүдийг бүрдүүлнэ гэлээ. “Алтан Цом”-ын 2022, 2023 оны барилдааны шагналын сан 650,000,000 төгрөг байсан бол энэ жилийн барилдааны шагналын сан 1,500,000,000 төгрөг байхаар шийдвэрлэжээ.